Ministrit serb, Vjosa Osmani në KS OKB: Mos na mbajë ligjërata këtu! Serbia kancer në zemër të Europës !

Presidentja e Kosovës, Vjosa Osmani, në mbledhjen e Këshillit të Sigurimit të Kombeve të Bashkuara për situatën në Kosovë, i ka bërë thirrje Serbisë që të kuptojë realitetin se Kosova e pavarur më s’ka kthim prapa.

Duke folur në kuadër të mbledhjes periodike për situatën në Kosovë, Osmani ka bërë thirrje për pranim të Kosovës në organizata ndërkombëtare ndërsa për mandatin e UNMIK-ut tha se është në kontradiktë me interpretimin e Gjykatës Ndërkombëtare të Drejtësisë për Kosovën dhe ka bërë thirrje që të vendoset buxheti i dedikuar për të për përdorim më të mirë.

“Republika e Kosovës sot është vend i lirë, sovran, i pavarur dhe gjithnjë e më i begatë. Kjo duhet të shërbejë si dëshmi e mjaftueshme për ta bërë të qartë për të gjithë se jo vetëm që UNMIK–u, e ka tejkaluar mandatin e tij, por është gjithashtu në kundërshtim me interpretimin e Gjykatës Ndërkombëtare të Drejtësisë – një organ i OKB-së. Ndërkohë që i falënderojmë për punën e tyre, ju inkurajojmë që ta përdorni buxhetin tuaj për çështje më të rëndësishme,” tha Osmani duke shtuar se Kosova është e gatshme të ulet në dialog me qëllimin final për njohje reciproke.

“Kosova gjithmonë ka qenë fqinj paqësor, fqinj i cili nuk i ka përdorur institucionet që të ndërhyjë në institucionet e vendeve të tjera dhe nuk kemi krijuar destabilizim. Fatkeqësisht nuk mund të themi se ky është rasti me Serbinë,” për të cilën ajo shtoi:

“Serbia duhet ta kuptojë që realiteti i Kosovës së pavarur kurrë s’do të ndryshojë!”

Vjosa Osmani tha në KS OKB se Kosova ka zbatuar 90 për qind të Marrëveshjeve së Brukselit, dhe se është Serbia ajo që s’i ka respektuar, e luftën kundër krimit të organizuar e cilësoi luftë që s’ka cak një etni.

Në fjalimin e saj, Osmani ka përmendur edhe storie suksesi nga Kosova duke nisur nga xhudistet e tek filmat që kanë shpërthyer në arenën ndërkombëtare ndërsa fjalë të mira folir edhe për procesin e vaksinimit.

Për aksionet e fundit institucionale në veri, ajo ka demantuar shefin e UNMIK-ut duke thënë se NATO-ja dhe KFOR-i, dhe ambasadat e tjera të QUINT-it kanë qenë në dijeni.

Duke iu përgjigjur ministrit të Jashtëm serb, Osmani i ka thënë atij të mos mbajë ligjërata.

Duke iupërgjigjur ministrit të Jashtëm të Serbisë në OKB, Nikolla Selakoviq në lidhje me deklaratat e tij për marrëveshjen e Brukselit si dhe aksionet e Policisë në veri, Presidentja e Kosovës, Vjosa Osmani, tha se Kosova ka sjellë ide të reja në tavolinë e dialogut në Bruksel  dhe se Serbia ka refuzuar gjithçka.

“Sot Kosova vazhdon që të jetë një avokuese shumë e madhe e paqes. Në muajt e fundit Kosova ka sjellë ide në tavolinë dhe Serbia ka refuzuar gjithçka. Serbia duhet të angazhohet që të sjellë ide në Kosovë dhe të mirëkuptohet se realiteti i Kosovës së pavarur nuk do të ndërrojë”, tha ajo.

Madje sa i përket Asociacionit, Osmani iu drejtua Selakoviqit me fjalët “mos na mbani ligjërata”.

“Ne duhet të prezentojmë interesin e vendit tonë në mënyrën më të mirë për të zhdukurit gjatë luftës. Nëse dëshirojmë të jemi të suksesshëm duhet që homologët të zbatojnë marrëveshjen e Brukselit. Nëse flasim për Asociacionin multietnik sipas Kushtetueses është e qartë që marrëveshja ka qenë në kundërshtim me Kushtetutën”, ka thënë Osmani.

“Zoti Selakoviq mos na mbani ligjërata për këtë sepse Serbia po i injoron pjesët Ligjore të Marrëveshjes së Brukselit. Strukturat kriminale kanë vazhduar me terror dhe nuk i kanë lejuar të vazhdojnë serbët e Kosovës që të integrohen. Më lejoni që të jem e qartë, lufta kundër krimit dhe korrupsionit në veri dhe jug nuk është e negociueshme. Tetë qytetarë të Kosovës janë arrestuar, gjashtë kanë qenë. Të gjithë kanë qenë në dijeni që ky ka qenë një veprim ligjor, ambasada e SHBA-ve, KFOR-i dhe QUINT-i,” tha Presidentja e Kosovës, Vjosa Osmani, në Këshillin e Sigurimit në OKB ndërsa foli për krimet e Serbisë të kryera në Kosovë ku akuzoi udhëheqjen në Serbi se po vazhdon me qëllimet e njëjta me ato që kishte pasë krimineli Sllobodan Millosheviç.

Për këtë të fundit, Osmani tha se Aleksandar Vuçiç flet me admirim për regjimin e Millosheviqit dhe e bën të njëjtën propagandë si ai.

“Më lejoni të flas për rezultatet e regjimit. 140 mijë persona kanë humbur jetën gjatë gjenocidit të Millosheviqit në ish-Jugosllavi. Në Kosovë më shumë se 30 mijë persona janë vrarë, 20 mijë gra janë dhunuar dhe më shumë se 160 mijë persona janë zhdukur dhe akoma po hapen varre masive. Mbi 1 milion qytetarë janë zhvendosur nga Kosova. Këto kanë ndodhur para syve tuaj, përpara syve të botës,” tha Osmani.

“Nuk duhet të harrojmë regjimin serb. Fatkeqësisht ministrat e Millosheviçit po e udhëheqin vendin sot dhe strategjia e tyre ndoshta ka ndryshuar, por qëllimet e tyre janë të njëjta. Ka propagandë të njëjtë”.

Kur Vuçiçi përmend “targetin prej nëntë kilometrave të armikut”, tha Osmani, do të thotë se nuk është vetëm Kosova brenda atij kilometri, por tetë shtete, gjashtë prej të cilave janë shtete anëtare të NATO-s.

“Kancerin e kemi në zemër të Europës që të krijojë botën serbe që ndihmohet nga aleati i tyre Rusia. Pavarësia e Kosovës është permanente dhe e pakthyeshme dhe sa më shpejt që të gjithë vijnë te termet e këtij realiteti më e mirë do të jetë për paqe dhe stabilitet për të gjithë rajonin. Republika e Kosovës ka të drejtë të ekzistojë dhe nuk mund të mohohet, ndalohet dhe më e rëndësishmja nuk mund të injorohet. Shumica e botës e ka njohur Republikën tonë të re dhe koha ka ardhur që edhe ju të tjerët ta bëjnë,” tha Presidentja e Kosovës, Vjosa Osmani në KS OKB duke bërë thirrje që të dëgjojnë rrëfimin dhe të vërtetën e Kosovës dhe tha se Kosova është aty për të adresuar çështjet.