Ministrit Sveçla i refuzohet vizita në Luginë, MPJD: Veprime për të mbajtur tensione me Kosovën!
Ministrit të Brendshëm të Kosovës, Xhelal Sveçla, i është refuzuar vizita në Luginën e Preshevës nga Qeveria e Serbisë me arsyetimin se qëndrimet e ministrit Sveçla janë të drejtuara kundër komunitetit serb në Kosovë dhe kundër paqes dhe stabilitetit.
“Ministri i Punëve të Brendshme të Republikës së Kosovës, z. Xhelal Sveçla, më datën 23 dhe 24 dhjetor 2024 ka paralajmëruar vizitë zyrtare njëditore në Luginën e Preshevës, Medvegjë dhe Bujanoc. Në kuadër të kësaj vizite, ministri z. Sveçla kishte paraparë takime me përfaqësuesit e Këshillit Kombëtar të Shqiptarëve të Luginës, KKSH, duke filluar me përfaqësuesit e Zyrës së KKSH-së në Medvegjë, për të vazhduar në Bujanoc, në selinë e KKSH-së, si dhe më pas në Preshevë, në selinë e degës së KKSH-së për këtë komunë,” thekson Ministria e Punëve të Jashtme dhe Diasporës, përmes një komunikate.
Sipas MPJD-së, përkundër faktit që janë ndjekur të gjitha procedurat e parapara për vizita të tilla zyrtare të përfaqësuesve qeveritarë dhe shtetërorë të Republikës së Kosovës në Serbi sipas Marrëveshjes së Brukselit për Vizita Zyrtare, Qeveria e Serbisë e ka refuzuar kërkesën për lejimin e kësaj vizite.
“Si pretekst për refuzim janë theksuar qëndrimet dhe veprimet e ministrit Sveçla, të cilat, sipas Qeverisë së Serbisë, janë të drejtuara kundër komunitetit serb në Republikën e Kosovës si dhe kundër normalizimit, paqes dhe stabilitetit. Qeveria e Serbisë gjatë këtyre dy viteve të fundit ka refuzuar rregullisht vizitat e zyrtarëve të lartë qeveritarë të Republikës së Kosovës, posaçërisht kur bëhet fjalë për vizitat në Luginën e Preshevës, Medvegjës dhe Bujanocit,” shprehet MPJD në reagimin e saj duke përfunduar.
“Veprime të tilla të Qeverisë së Serbisë kanë për qëllim të qartë mbajtjen e tensioneve me Republikën e Kosovës në shkallë të lartë. Janë pjesë e provokimeve të vazhdueshme, të cilat Serbia i bën në baza të rregullta dhe me qëllim të shkaktimit të konflikteve, ku aktet terroriste në Banjska dhe Ibër-Lepenc janë manifestimi më i dukshëm i këtyre synimeve nga ana e Serbisë.”
Ndërkohë, Qeveria e Kosovës ka ndarë sot 1.1 milionë euro mbështetje për të gjitha familjet shqiptare në Luginën e Preshevës që merren me bujqësi.
“Ndarë 1,108,529 Euro mbështetje për të gjitha familjet shqiptare nga Presheva, Medvegja dhe Bujanoci, qё nё mënyrë aktive merren me bujqësi sipas thirrjes publike të Këshillit Kombëtar Shqiptar, KKSH, përfshirë këtu financimin për programet nga thirrja publike e KKSh-së për avancimin dhe socializmin e fëmijëve me nevoja të veçanta. Është aprovuar kërkesa e Ministrisë së Financave, Punës dhe Transfereve për kursime dhe ndarje,” thuhet në Vendimin e Qeverisë së Kosovës.
Ndryshe, përveç vizitave të ministrit Xhelal Sveçla, janë refuzuar rregullisht edhe vizitat e ministrave të tjerë të Kosovës, e fundit nga të cilat ka qenë vizita e Ministrit për Kulturë, Rini dhe Sport, Hajrulla Çeku, e paralajmëruar ditë më parë, më 19 dhjetor 2024.
Edhe vizita e Zv/Kryeministres dhe Ministres së Punëve të Jashtme dhe Diasporës, Donika Gërvalla, e paralajmëruar më 27 shkurt 2024, për të marrë pjesë në Pritjen për Përvjetorin e Pavarësisë së Kosovës, e organizuar nga Zyra Ndërlidhëse e Republikës së Kosovës në Serbi, ishte refuzuar pa asnjë arsyetim të vlefshëm dhe disa orë para se Donika Gërvalla të arrinte në pikën kufitare.
