Ministrja e Drejtësisë, Etilda Gjonaj raporton para Bundestagut

Ministrja e Drejtësisë, Etilda Gjonaj zhvilloi sot një seancë dëgjimore me një grup deputetësh të Parlamentit Gjerman të kryesuar nga Florian Hahn, pjesë e Komisionit për Çështje Evropiane.

Sipas njoftimit të Ministrisë së Drejtësisë, Hahn, në fjalën e tij të mirëseardhjes vlerësoi praninë e delegacionit shqiptar në kushtet kur edhe Bundestag shumë shpejt do të marrë një vendim për qendrimin që do të mbajë Gjermania mbi rekomandimin e Komisionit të BE për hapjen e negociatave me Shqipërinë.

Ministrja e Drejtësisë i njohu pjesëmarrësit me proceset e rëndësishme shtetformuese që ka ndërmarrë Shqipëria, veçanërisht Reformën në Drejtësi, luftën kundër korrupsionit dhe krimit të organizuar. Ajo bëri me dije që rekomandimi i Komisionit të BE për hapjen e negociatave me BE është një vlerësim për të gjitha arritjet e Shqipërisë deri më tani, veçanërisht duke marrë në konsideratë që Shqipëria ka ndërmarrë reformat më të thella në sistemin gjyqësor dhe në luftën kundër krimit të organizuar në krahasim me çdo shtet tjetër në Ballkanin Perëndimor.

Ajo vlerësoi asistencën teknike dhe financiare të ofruar nga Gjermania si pjesë e misionit EURALIUS që nga fillimi i Reformës në Drejtësi, si dhe në zbatimin e saj. Më pas, ajo i njohu deputetët me rezultatet e para të prekshme të procesit të rivlerësimit kalimtar të gjyqtarëve dhe prokurorëve si dhe me mbështetjen e Qeverisë shqiptare për ngritjen e organeve të reja të sistemit të drejtësisë, veçanërisht ngritja e dy Këshillave, si organet përgjegjëse të ngarkuara nga Kushtetuta me mirëqeverisjen e sistemit gjyqësor dhe atij të prokurorisë.

Ministrja Gjonaj bëri me dije masat që Qeveria shqiptare ka marrë për të forcuar luftën kundër kultivimit të kanabisit, duke vënë në dukje që për herë të parë Shqipëria ka dalë nga harta e vendeve kultivuese të kanabisit.

Gjithashtu, në funksion të luftës kundër krimit të organizuar ndërkombëtar, Ministrja Gjonaj i bëri me dije që Shqipëria ka miratuar në parim marrëveshjen me Eurojust, e cila i lejon autoriteteve Shqiptare që në bashkëpunim me autoritetet e tjera të vendeve të BE të kryejnë hetime të përbashkëta.

Ministrja e Drejtësisë i bëri me dije të deputetëve që pavarësisht fillimit të ngadaltë, procesi i Vettingut po ecën me një ritëm të kënaqshëm dhe është parashikuar që shumë shpejt do të përfundojë rivlerësimi i listës prioritare dhe më pas menjëherë mund të ngrihen organet e reja të sistemit të drejtësisë. Gjithashtu, ajo bëri me dije që reforma në drejtësi dhe reformat e tjera që po ndërmerr Shqipëria për çështjen e pronave, përmirësimin e shërbimeve publike dhe derregullimin garantojnë forcimin e shtetit të së drejtës dhe rrugëtimin evropian të Shqipërisë.

Në përgjigje të pyetjeve të deputetëve, Gjonaj i njohu ato me nismën për ndryshimet ligjore që garantojnë një numër të përshtatshëm kandidatësh për t’u pranuar në sistem nëpërmjet Shkollës së Magjistraturës nëpërmjet të cilëve garantohet përmbushja e çdo vakance të krijuar si pasojë e procesit të vetingut.

Ministrja Etilda Gjonaj e përmbylli fjalën e saj duke u shprehur që reformat që po ndërmarrim, më shumë se sa një një detyrë shtëpie në kuadër të integrimit në BE, janë perspektiva evropiane që ne duam t’i ofrojmë qytetarëve Shqiptarë. Ajo deklaroi që ne duam që qytetarët shqiptar ta gjejnë Evropën në Shqipëri.

Në seancën dëgjimore para Bundestagut, Ministrja Gjonaj ishte e shoqëruar nga Kryetarja e Komisionit për Politikën e Jashtme, Mimi Kodheli,  Deputetja e Kuvendit të Shqipërisë, Rudina Hajdari, zv/ministri i Brendshëm, Besfort Llamallari si dhe Drejtori i Drejtorisë Gjyqësore në Prokurorinë e Përgjithshme, Adnan Xholi dhe Drejtuesi i Projektit Tëinning kundër Korrupsionit, Detlef Kreutzer.