Ministrja e Tregtisë: Do të vendosim reciprocitet për mallrat serbe!

Ministrja e Tregtisë, Rozeta Hajdari, tha se Qeveria e Kosovës, veçse ka nisur vendosjen e reciprocitetit ndaj Serbisë. Megjithatë ajo shpjegoi në hapa konkret se në ç’mënyrë është planifikuar vendosja e kësaj mase.

Ministrja e Tregtisë dhe Ndërmarrësisë, Rozeta Hajdari, tha se Qeveria ka vendosur e do të vazhdojë të vendosë masa për mbrojtje nga importi. Në një konferencë pas mbledhjes së sotme të Qeverisë, ajo ka folur për masat anti-dumping, që kanë të bëjnë me taksën për produktet e huaja.Ministrja  Hajdari foli edhe për masat e reciprocitetit ndaj mallrave që vijnë nga Serbia, për çka tha se do të vendosen masa të reciprocitetit.

“Po do të vendosim masa reciprociteti dhe janë duke u vendosur veçse. Nëse e kuptoni konceptin e reciprocitetit, ai do të thotë barazi dhe këtë do ta shtyjmë përpara. Ligji për masat antidamping, për mbrojtje nga importet, të gjitha këto kanë të bëjnë me barazi e reciprocitet. Masat e komformitetit jemi duke i zbatuar. Ju njoftoj se çka është zbatuar nga ministria për mbrojtjen e tregut. Kemi marrë vendimet për masat antidamping për t’i mbrojtur sektorët që janë të rrezikuar nga importi dhe presim se si do të na udhëzojnë analizat që jemi duke i bërë. Ne jemi akuzuar nga ministrja e Ekonomisë së Serbisë për diskriminim, por jemi duke punuar për barazi”.

Hajdari ka folur edhe për programin “Single market”. Ajo ka thënë se informacionet për programet rajonale nuk kanë ardhur me kohë dhe nuk i kanë gjetur në ministri kur e kanë marrë drejtimin e saj.

“Kosova e ka kryer obligimin e vet kur e kemi dorëzuar aplikimin, tani pritet që negocimi të përfundojë, meqë është program i përbashkët me BE-në. Anëtari i bordit të Malit të Zi më ka njoftuar se Kosova mungon dhe ne nuk kemi pas informacione për këtë. Ky program është me pjesëmarrje të 250 bizneseve së shpejti do të emërojmë përfaqësuesit e Kosovës”, ka thënë ajo.

Ditë më parë  kryetari Komisionin për Ekonomi, Industri, Ndërmarrësi dhe Tregti, Ferat Shala tregoi se barrierat tregtare ndërmjet të dy vendeve janë rritur së fundi edhe më shumë, prandaj edhe një diskutim i tillë do të mund të shërbente në gjetjen e ndonjë zgjidhje.

Kurse, përfaqësuesja e KDI-së, Violeta Haxholli tha se në vazhdimësi kanë ofruar asistencë për Kuvendin për të fuqizuar rolin ndaj dialogut Kosovë-Serbi.

Ndonëse tha se kompanitë kosovare po dëmtohen shumë nga barrierat e shtetit fqinjë, ajo ka kërkuar që temat ekonomike mos të jenë pjesë e përplasjeve politike.

“Çështja e barrierave mes dy vendeve ka qenë gjithmonë temë. Çështja e raporteve Kosovë-Serbi ka qenë ndër temat që spektri politik nuk ka gjetur dakordim. Aktualisht nuk ka reciprocitete dhe  kompanitë hasin sfida. Kosova ka aplikuar masa mbrojtëse ndaj Serbisë në vitin 2011”. Në atë kohë ishte arsyeja që Serbia të pranonte vulën doganore. Reciprociteti tregtar është shfuqizuar nga Qeveria Hoti. Tani kemi Qeveri të re e cila ka deklaruar se do të vendos reciprocitet tregtar me Serbinë, por ende nuk ka vendim. Ministrja ka paralajmëruar që do të hetohen produkte që po hyjnë nga Serbia. Ajo çfarë kemi evidentuar është që kjo temë të mos bëhet temë e përplasjeve politike”./Monitor/