Kosova dorëzon aplikimin në KiE, alarmohet Vuçiç! Rama: Na vjen keq për Serbinë!

Pas aplikimit zyrtar të Kosovës për anëtarësim në Këshillin e Evropës, KiE nga Ministrja e Punëve të Jashtme e Diasporës, Donika Gërvalla, ka reaguar i alarmuar Presidenti i Serbisë, Aleksandar Vuçiç, duke e thirrur për nesër në orën 11:00 Këshillin serb të Sigurisë.

“Mentorët e Prishtinës janë shumë më të fortë, këtë lojë e kryesojnë shtetet kryesor perëndimore e ne jemi vend i vogël i cili ruan sovranitetin e saj dhe të drejtën për të vetëvendosur. Ata do të bëjnë gjithçka që ne të pranojmë pavarësinë e Kosovës, neve na takon ta ruajmë vendin tonë.

Prishtina ka marrë mbështetjen e SHBA për hyrje në Partneritetin për paqe, por kjo nuk ju vlenë nëse nuk marrin dritën jeshile nga Serbia,” tha duke mashtruar Aleksandar Vuçiç para qytetarëve të mbledhur në Panairin e automjeteve në Beograd duke mashtruar gjithashtu se për 10 vjet Kosova ka shkelur Marrëveshjen e Brukselit, tani shkel Marrëveshjen e Washingtonit dhe Rezolutën 1244 të KS OKB.

I pyetur lidhur me deklaratën e Kryetarit të Komisionit për Ballkanin Perëndimor pranë Bundestagut, Josip Juratoviç se “Vuçiç nuk mund të luaj më, që diçka të thotë në Bruksel, tjetër në Moskë, Beograd dhe krejtë diçka tjetër në një fshat serb”, Vuçiç tashmë i zemëruar nga lajmi i marrë nga Strasburgu akuzoi të gjithë.

“Kur shkoi në Moskë, në konferencë para Vladimir Putinit them se Serbia është në rrugën evropiane dhe dëshiron marrëdhënie të mira me Rusinë, e në Bruksel them se Serbia dëshiron të ruaj marrëdhënie të mira me Rusinë edhe pse është në rrugën evropiane.

Kur shkoj në SHBA gjithashtu dhe nuk ka njeri që i është përgjigjur në këtë mënyrë cilit do president amerikan. Kur shkoj në Kinë, gjithmonë them se Serbia është në rrugë evropiane,” dhe nuk e kam të qartë se në cilin qytet ose fshat, ose në televizion kam folur ndryshe.

Ndërkohë Kryeministri Edi Rama duke u shprehur se i vjen keq për Serbinë në këtë rast, tha se do të mbështesim Kosovën!

“Kjo nuk do diskutim fare. Ne jemi shumë të qartë. Ne nuk kemi asnjë ekuivok. Ne jemi në mbështetje absolute të Kosovës në çdo hap dhe për çdo gjë që lidh Shqipërinë, Kosovën dhe komunitetin ndërkombëtar. Ndërkohë që ne kemi qasje komplet tjetër kur vjen puna tek normalizimi i marrëdhënieve hap pas hapi në aspektin ekonomik, në aspektin e lirisë së lëvizjes e të tjera e të tjera, me Serbinë paralelisht me betejën në tryezë, betejën diplomatike për dialog e kështu me radhë sepse besojmë që kjo është rruga, kjo është rruga dhe nga ana tjetër respektojmë plotësisht zgjedhjen e bërë nga autoritetet legjitime, të votuara, të mandatuara, përgjegjëse të Kosovës për të patur një qasje komplet tjetër në këtë aspekt. Por kur vjen puna tek demarshet e Kosovës në arenën ndërkombëtare, ne jemi 100% me Kosovën,” tha Edi Rama duke përfunduar:

“Serbia sigurisht është në të drejtën e vetë të mendojë krejt ndryshe, na vjen keq për Serbinë në këtë rast, por ne do të mbështesim Kosovën!”

Ndryshe, ministrja e Punëve të Jashtme dhe Diasporës, Donika Gërvalla, pasi dorëzoi personalisht aplikimin e Kosovës për anëtarësim në Këshillin e Evropës, nga Strasburgu tha se sot nis një kapitull i ri i Kosovës.

“Sapo dolëm nga takimi me zëvendëssekretarin e përgjithshëm të Këshillit të Evropës. Në emër të Republikës së Kosovës dorëzuam kërkesën për anëtarësim në Këshill të Evropës.

Sot hapet një kapitull i ri për Kosovën në Këshillin e Evropës, sot fillon procedura e shqyrtimit të kërkesës sonë e cila do të kalojë nëpër instanca të ndryshme të Këshillit të Evropës, të Asamblesë Paralementare dhe Këshillit Ministrorë,” tha Donika Gërvalla e bindur se kjo nismë e sotme do të përfundojë me anëtarësim të Kosovës në Këshillin e Evropës, pasi Kosova e meriton të jetë pjesë e kësaj organizate.

Më 16 mars të këtij viti, Rusia është përjashtuar nga Këshilli i Evropës, për shkak të nisjes së luftës së paprovokuar në Ukrainë. Në mungesë të Rusisë, dy të tretat e shteteve anëtare të kësaj organizate e njohin pavarësinë e Kosovës. Meqë vendimet merren me shumicë, pranimi i Kosovës në Këshillin e Evropës është çështje kohe.

Ndërkohë akuzën publike të Presidentit të Serbisë, Aleksandar Vuçiç, për Kosovën se po e shkel moratoriumin njëvjeçar të marrëveshjes së Washingtonit, është një mashtrim serb i radhës sepse ai ka skaduar në shtator të vitit 2021. Sipas këtij moratoriumi të firmosur më 4 shtator të vitit 2020, parashikohej që për një vit, Serbia të ndalte fushatën në kërkim të ҫnjohjes së pavarësisë së Kosovës, ndërsa, Kosova, do të ndalte përpjekjet për anëtarësim në organizata ndërkombëtare.