Miratohet buxheti i vitit 2022

Me 65 vota për dhe kundërshtimin nga opozita, Parlamenti i Kosovës në seancë të jashtëzakonshme miratoi buxhetin e vitit 2022 prej 2.7 miliardë euro.

Në lexim të dytë Buxhetit për vitin 2022 iu shtuan mbi 80 amendamente. Shumica e tyre, që u iniciuan nga opozita, nuk u miratuan. Kjo shkaktoi dhe përplasje mes opozitës dhe deputetëve të Vetëvendosjes.

Pas miratimit të Buxhetit për vitin 2022, Kryeministri Albin Kurti duke falënderuar deputetët që e votuan thekson se buxheti për këtë vit do të jetë buxhet i zhvillimit.

“Me 40 milionë euro tjera do të mbështesim ringritjen e ndërmarrjeve publike si Trepça e Telekomi, 70 milionë euro për bujqësinë, kurse për punësimin e garantuar për të rinjtë kemi ndarë edhe 20 milionë euro. Krijimi i vendeve të reja të punës është prioritet i koduar edhe në këtë buxhet,” tha Albin Kurti duke e cilësuar si buxhet i mirëqenies dhe solidaritetit:

“Sepse kemi ndarë 45 milionë euro për shtesat për lehona dhe fëmijë, sepse kemi ndarë edhe 35 milionë euro për t’u siguruar se asnjë pension nuk mbetet nën 100 euro dhe secilës familje në asistencë sociale shtesa prej 30 për qind i bëhet e përhershme,” thekson Kryeministri i Kosovës, Albin Kurti, duke përfunduar:

“Ky është buxhet i investimeve sepse me mbi 700 milionë euro do të investojmë në arsim e shëndetësi, kulturë e sport, infrastrukturë e siguri.”