Miratohet çelja e kushtëzuar e negociatave të BE me Shqipërinë dhe Maqedoninë në vitin 2019
Pas debateve të tensionuara është arritur konsensusi për miratimin e kushtëzuar të çeljes së negociatave të Bashkimit Evropian me Shqipërinë dhe Maqedoninë.
“Këshilli është dakord që të hap rrugën drejtë negociatave për anëtarësim në qershorin e vitit 2019,” thekson dokumenti përfudnimtar i Këshillit të BE për çështje të përgjithshme.
Takimi i Luxemburgut ku ministrat e jashtëm shqyrtuan çeljen e negociatave më Shqipërinë dhe Maqedoninë, është zhvilluar në një klimë plotë me tensione, ku Franca dhe Holanda nuk lëshuan pe, raporton RFE.
Në deklaratën e kompromisit, nëse mund të quhet e tillë, Ministrat i kërkojnë Shqipërisë dhe Maqedonisë që të demonstrojnë përparim në reforma para se negociatat të çelen në fund të viti 2019. Përparimi duhet të përfshijë “ rezultate të prekshme dhe të qëndrueshme” në gjyqësor, në shërbimet e sigurisë, administratën publike, si dhe luftimin e korrupsionit.
Franca, Holanda dhe Danimarka: JO!
Para arritjes së “kompromisit”, Ministri i Punëve të Jashtme i Greqisë, Nikos Kotzias ka konfirmuar se rreth çështjes së çeljes së negociatave me Maqedoninë dhe Shqipërinë, Bashkimi Evropian është i ndarë në dy grupe: 25 anëtaret e BE që mbështesin çeljen e negociatave për anëtarsim të Maqedonisë dhe Shqipërisë në verën e vitit 2019, dhe grupi i dytë prej tri anëtareve (Franca, Holanda dhe Danimarka) që e kundërshtojnë duke konsideruar se “procesi duhet ndryshuar”.
“Ndryshimi i proceseve evropaine do të thotë ndryshimi i stabilitetit dhe sigurisë për gjithë rajonin,” tha Kotzias i cili foli në kulisat e takimit të Luksemburgut, ku po zhvillohej një debat i ashpër rreth rekomandimeve të Komisionit Evropian për çeljen e negociatave me Maqedoninë dhe Shqipërinë.
“E di që janë disa vende që kanë frikë nga populizmi. Nuk mund ta luftoni populizmin dhe të fitoni ndaj populizmit duke bërë hapa mbrapa,” tha Kotzias.
Ndryshe, Gjermania kishte kërkuar sot nga Franca dhe Holanda që të mundësojnë çeljen e negociatave me Shqipërinë dhe Maqedoninë në mënyrë që ta ndihmojnë stabilizimin e Ballkanit Perëndimor, pasi që diplomatët e BE nuk arritën të dakordohen rreth kushteve të negocimit, raportonte Agjencia britanike e lajmeve Reuters.
Parisi dhe Haga angazhohen kundër përpjekjeve të BE që të çelin negociatat e anëtarësimit me dy shtetet, sepse Franca është e vendosur që Bashkimi Evropian fillimisht duhet të reformoj institucionet e veta para se të pranoj anëtaret e reja.
Por shtetet tjera, të kryesuara nga Berlini, po bëjnë presion që gjashtë shtetet e Ballkanit Perëndimor të anëtarësohen në BE në mënyrë që të forcohet ndikimi në rajon përballë Rusisë gjithnjë e më agresive, thekson Reuters.
