Miratohet harta e re gjyqësore, shkurtimi i gjykatave fillon nga shkurti i ardhshëm

Në mbledhjen e fundit të qeverisë është miratuar harta e re gjyqësore, bëri te ditur sot ministri i Drejtësisë, Ulsi Manja. Shkurtimi i gjykatave fillon nga shkurti.

“Është miratuar harta e re gjyqësore, Shqipëria me hyrjen në fuqi të kësaj harte do të ketë 13 Gjykata të Shkallës së Parë, 1 Gjykatë Apeli dhe 2 Gjykata Administrative.

Miratimi i hartës është një hap i rëndësishëm për zbatimin e Reformës në Drejtësi. Harta është bashkëpropozim i Këshillit të Lartë Gjyqësor dhe i Ministrisë së Drejtësisë. Është produkt i një grupi ekspertë vendas e ndërkombëtarë.

Qytetarët do t’i marrin të gjitha shërbimet gjyqësore në strukturat ekzistuese të Gjykatave. Implementimi i hartës  do të bëhet me faza. Më 1 shkurt do të kemi përqendrimin e Gjykatës së Apelit në Tiranë, në 1 maj do të jenë Gjykata e shkallës së Parë të Juridiksionit të Përgjithshëm dhe më 1 korrik do të jetën Gjykatat Administrative të Shkallës së Parë.

Harta e re gjyqësore ka disa risi, raporton Monitor, do të standardizojë kohën e dhënies së vendimit, do bëjë shpërndarje të drejtë të çështjeve tek gjyqtarët, do ulë kostot. Ajo që kemi sfidë është që këtë fazë tranzitore, do ta shfrytëzojmë si periudhë edukimi të qytetarëve për gjykatat e reja”, tha Manja.

Deri në fund të 2021 janë 28,144 çështje që presin të shqyrtohen nga gjykatat 6 Gjykatat e Apelit të Shqipërisë sipas të dhënave të relacionit të projekt-aktit të KLGJ-së për organizimin e gjykatave.

Avokatët kanë pohuar më herët se harta e re gjyqësore nuk zgjidh problemin e stokut të dosjeve të pashqyrtuara, numri i dosjeve do të bëhet mal dhe sistemi rrezikon të hyjë në kolaps.