Miratohet Ligji për Rimëkëmbje Ekonomike
Pas miratimit të 4 amandamenteve të propozuara nga PDK, me 72 vota për asnjë kundër dhe asnjë abstenim, Parlamenti i Kosovës miratoi Ligjin për Rimëkëmbjen Ekonomike. Ky Ligj pritet të mundësoj rikuperimin e humbjeve të bizneseve për shkak të pandemisë se shkaktuar nga koronavirusi COVID-19.
Cilat ishin amandamentet që i propozuan dhe i ndryshuan mendjen Partisë Demokratike të Kosovës për të votuar Projektligjin për Rimëkëmbje Ekonomike të propozuar nga Avdullah Hoti.
Amandamenti i parë është që mjetet e tërhequra nga pjesëmarrësit sipas këtij neni, e të cilët kanë kursime deri në 9.999 mijë euro kompensohen në formë rimbursimi, duke filluar nga viti 2023, sipas formulës dhe metodologjisë së rimbursimit që vendoset me vendim të Qeverisë së Kosovës dhe Fondin e Kursimit Pensional të Kosovës në afatin prej gjashtë muajsh nga miratimi i këtij ligji.
Amandamenti i dytë, lënda e parë e cila prodhohet nga veprimtaritë biznesore të regjistruara dhe aktive në Republikën e Kosovës, pavarësisht se a eksportohet jashtë vendit apo jo, lirohet nga TVSH.
Amandamenti i tretë, të gjitha bizneset të cilat kanë qenë të mbyllura apo kanë pasur probleme të funksionimit të rregullt gjatë kohës së pandemisë, por të cilët kanë qenë aktive të regjistruara në regjistër të biznesit para datës 29 shkurt 2020, mbështeten financiarisht nga ana e buxhetit të Kosovës me mjete monetare për t’i mbuluar shpenzimet operative në shumën prej 200 milionë euro.
Amandamenti i katërt, paguhen nga ana e buxhetit të Kosovës, pagat e punonjësve në sektorin privat për periudhën tetor dhe dhjetor 2020, të cilët si pasojë e pandemisë COVID-19 janë larguar apo pezulluar nga puna e tyre për periudhën jo më të shkurtër se tre muaj pas datës 29 shkurt 2020 e deri më 30 dhjetor 2020. Shuma e pagesës për punëtorët është 300 euro për një muaj.
