Miratohet Projektligji që njeh kontributet e punëtoreve të viteve ’90

Qeveria e Kosovës ka miratuar Projektligjin për ndryshimin e Ligjit për skema pensionale të financuara nga shteti. Kjo ua mundëson 70 mijë pensionistëve njohjen e kontributit edhe gjatë viteve të largimit të dhunshëm nga puna.

“Përmes tij do të adresojmë çështjen e pabarazisë disavjeçare, të mosnjohjes të së drejtës pensionale në skemën e pensionit kontributpagues, të një numri të madh të pensionistëve të cilët nuk përmbushin kriterin prej 15 vjetësh kontribut në ish – sistemin pensional,” tha Kryeministri Albin Kurti ndërsa Ministri i Financave, Hekuran Murati, sqaroi se ky vendim është diçka që s’është bërë qe 20 vjet.

“Si rezultat i largimit të dhunshëm kanë mbetur shumë persona, shumë punëtor të cilët kanë kontribuar me 14 vite 11 muaj por s’kanë arritur ta permbushin kushtin prej 15 vitesh. Ne përmes këtij ligji po e zh’bëjmë atë diskriminim sepse do t’u mundësohet që nga periudha kur janë larguar nga puna e deri më 1 janar 1999, do t’u llogaritet e drejta e plotësimit prej 15 vitesh, ndërkaq lartësia e pensionit do t’iu llogaritet varësisht nga vitet që kanë kontribuuar në trustin pensional,” tha Murati.

Ndërkohë Ministri për Komunitete dhe Kthim në Qeverinë e Kosovës, Nenad Rashiç, tha se është hap i rëndësishëm për largim të vakuumit institucional.

“Si një paralajmërim e di që shumë njerëz mund të aplikojnë në këtë nivelizim shtesë por po ju dëshiroj që të keni të dhëna të sakata sepse mendoj që numrin e aplikantëve do të jetë më i madh sesa që do ta parashikoni.”