Miratohet Raporti, Komisioni Hetimor: Të shkarkohet Presidenti Republikës! Në Parlament do votohet…

Komisioni Hetimor Parlamentar ka miratuar raportin përfundimtar i cili propozon shkarkimin e Presidentit të Republikës, Ilir Meta.

Kryetari i Komisionit, Alket Hyseni, pasi e lexoi Raportin e ka hedhur në votim.

“Kush është dakord me raportin, konkluzionet e tij, gjithë sugjerimet? Miratohet raporti i Komisionit Hetimor për verifikimin e shkeljeve të rënda kushtetuese nga Presidenti i Republikës së Shqipërisë me votat unanime të gjithë anëtarëve të komisionit. Vlerësim maksimal për secilin nga ju kolegët,” tha Hyseni pas votimit.

Raporti pritet t’i shkojë brenda 7 ditësh Parlamentit ku duhet të marë 94 vota në mënyrë që Presidenti të shkarkohet. Nëse Parlamenti miraton shkarkimin, vendimi duhet të shkojë brenda 5 ditëve në Gjykatën Kushtetuese.

Fillimisht Gjykata Kushtetuese vendos me shumicë votash, pra 5 anëtarë që ta shqyrtojë kërkesën në seancë plenare. Në seancën plenare duhet të marrin pjesë të paktën 2/3 e anëtarëve, pra 6 anëtarë, dhe duhet të jetë publike.

Gjykata Kushtetuese duhet të vendosë me shumicën e anëtarëve, pra me të paktën 5 anëtarë për ta shkarkuar Presidentin.

RAPORTI

Komisioni Hetimor Parlamentar në raportin përfundimtar konstaton se me aktivitetin dhe deklaratat gjatë fushatës elektorale dhe ditës së heshjes zgjedhore, Presidenti i Republikës ka kryer shkelje të Kushtetutës.

Raporti thekson se Presidenti Meta ka shkelur parimin kushtetues për të qenë përfaqësuesi i unitetit kombëtar.

Presidenti i Republikës, thekson Raporti ka mbajtur qëndrime të njëanshme politike, duke shkelur Kushtetutën për paanësi politike. Hyseni tha se në deklaratat e tij, Presidenti Meta ka vënë në rrezik marrëdhëniet me Shtetet e Bashkuara të Amerikës dhe ka sulmuar ambasadoren amerkane Yuri Kim.

Sipas raportit, Presidenti ka cënuar imazhin e vendit. Presidenti është përfshirë direkt në fushatën elektorale duke sulmuar mazhorancën, ç’ka është e ndaluar në Kushtetutë. Retorika e Presidentit, gjithashtu thekson raporti, ka inkurajuar dhunën.

“Presidenti ka intimiduar votuesit duke thënë se ai vetë do i presë dorën, thirrje luftarake, vetëgjyqësie janë mesazhe të qarta drejt popullit. Kjo nxitje dhune detyroi ambasadoren e SHBA të apelojë presidentin meta të ndaloje këtë fushatë.  Në vend të ishte neutral, tregoi qartë anësi ndaj opozitës. Presidenti mori përsipër të jap leksione demokracie, që nuk gjendjen askund,” tha Hyseni duke lexuar raportin, për të cilin u shpreh se do i dërgohet Parlamentit për votim brenda 7 ditëve ndërsa shtoi:

“Sjellja e Presidentit duhet të përcaktohet si rol ekuilibrues në jetën politikë të vendit dhe nuk përfshihet në lojën e përditshme politike. Kryetari i shtetit nuk duhet të mbështesë forca të caktuar apo t’i kundërvihet forcave të ndryshme politike. Presidenti bëri një fushatë kundër partisë në pushtet me të gjithë fuqinë institucionale të tij. Edhe ODIHR shkruan se Meta mban një marrëdhënie kritike dhe të ashpër ndaj qeverisë duke ndikuar drejtpërdrejtë në zgjedhje me tonet e tij konfrontuese edhe të nxehta. Në kapacitetin e tij ai bëri fushatë kundër partisë në pushtet. Presidenti i Republikës nuk mund të mbajë asnjë detyrë tjetër publike, nuk mund të jetë anëtar partie dhe as të kryejë veprimtari tjetër private, shkruhet në ligjin më të rëndësishëm të vendit.”

Ndërkohë, lidhur me ngjarjen e ndodhur vetëm pak ditë para zgjedhjeve në zyrat e FRDsë, komisioni hetimor ka ngritur një akuzë ndaj Presidentit Meta:

“Ka shkelur nenin 94 të Kushtetutës, në të cilin thuhet: “Presidenti i Republikës nuk mund të ushtrojë kompetenca të tjera përveç atyre që i njihen shprehimisht me Kushtetutë dhe që i jepen me ligje të nxjerra në pajtim me të.”

Ndryshe, Komisioni Hetimor u ngrit me kërkesë të 49 deputetëve socialistë të cilët kërkuan shkarkimin e Ilir Metës nga posti i Presidentit të Republikës. Nëse për shkarkimin e Presidentit të Republikës në Parlament votojnë të paktën 94 deputetë, fjalën e fundit për shkarkimin ose jo të Presidentit Ilir Meta do ta jap Gjykata Kushtetuese.