Mirë e ka Edi Rama!
nga Agim Popoci
Në këto ditë të vështira që po kalon kombi shqiptar dhe e gjithë bota, ndonëse aplikojnë për leje edhe për të dalë në ballkon, shqiptarët kurrë më shumë se sot përsërisin refrenin: Mirë e ka Edi Rama!
Dhe ky refren bëhet më i zëshëm kur polici ndalon një të moshuar të sapo dal nga dyqani me bukë në dorë duke gërthitur pse nuk respekton urdhrin e Kryeministrit!
Ky refren bëhet edhe me pikant kur një zonjë e shkujdesur ndërsa paguan domatet i drejtohet rrugës për tu kthyer në shtëpi, dhe përballet me kërcënimin e policit: Zonjë a e keni dëgjuar Kryeministrin që kërkon distancimin social!
Të tilla raste ka në çdo furrë buke, dyqan ose treg fruta-perimesh, e pse jo dhe farmaci, pamje këto mizore që për çudi shoqërohen me tundje koke, pra miratim, të të gjithë atyre që shikojnë përreth.
E Kryeministri shkrihet kur sheh gjithë këtë terror dhe miratimin e shqiptarëve, vazhdon dhe del në të gjitha mediat nga Kulla e tij në Surrel, dhe u thotë shqiptarëve se do ti ashpërsoj sepse nuk respektojnë masat e përcaktuara nga Qeveria.
E shqiptarët e shkretë, edhe pse erdhën të jetojnë në Tiranë, frikën nga partia e morën me vete. Erdhi virusi i frikshëm nga Kina dhe Kryeministri doli ju tha lani duart! Nuk reaguan por e miratuan me refrenin: Mirë e ka Edi Rama!
Pra, nuk reaguan pse deri dje partia i donte zhulsa ose pse sot i do me duart e lara, dhe larg qoftë pse mendon ai nga Surreli se ne nuk i lajmë duart!
Distancimi social doli si shpikje që Corona ta ha munë, dhe partia tha dhe u bë! Askush nuk iu ankua Kryeministrit, ama në zë dëgjohej refreni: Mirë e ka Edi Rama!
Jo nga ato zonja që blejnë perime në pikë të vapës ose udhëtojnë me autobus dhe nga mbrapa u ngjiten burrat e djersitur; As nga ata që blejnë abone, dhe jo që nuk gëzojnë distancë sociale por as kokë të papërgjakur. Ama sot i gëzohen distancës sociale që e kërkon partia për shkak të Coronës dhe i donte të përlyer me djersë të panjohurish, dhe abone që ta kujtojnë për një muaj se si e kanë ble.
Dalja me makinë nuk është më komedi por tragjikomedi! Mund të aplikosh për leje-dalje dhe po nuk qe i partisë, në sekonda, ama për pak sekonda, përgjigja të vjen dhe normalisht negative. E ke kërkuar për punë, pak rëndësi ka, të mbetet vetëm ta lusësh Zotin që të mos sëmuresh sepse këtu nuk do të ndihmon as fakti që u binde se Kryeministri të mashtron. Po, aplikon kot, dhe makinën e ke private vetëm në parking, ndërsa për lëvizje ajo është shoqërore. Kooperativë, siç e do partia!
Nga Kulla e Surrelit nuk konstatohen reagime, vazhdojnë ashpërsohen masat, miratohen me tundje koke edhe pse Corona bënë punën e vet dhe Kryeministri në Facebook terrorizon miletin me arkivole nga Italia dhe Irani!
Kur dalin statistikat Kryeministri Edi Rama flet për rezultatin e masave, kur reagimi është i vakët, vaj halli për ata që e duan qetësinë dhe përballjen me Coronën, me masa shëndetësore dhe jo terrori. Jo, jo, duhet të kesh frikë nga masat e qeverisë dhe jo Corona sepse ç’kuptim kanë pastaj masat.
Laj duart, distancim social, makina nuk është e jotja por e qeverisë, dhe atij që i bie letra me vrimë le të dal me vrap për 60 minuta dhe të blejë aq sa mund të blihet për kohën që ta ka dhënë në dispozicion Kryeministër Edi Rama.
Të nesërmen, me masa të reja, pak metra pas daljes nga shtëpia rrugët bosh shoqërohen me refrenin: Mirë e ka Edi Rama! Por radha te farmacia, furra e bukës, dritat, uji dhe… konsumojnë minutat e qeverisë sa hap e mbyllë sytë. Debati në shtëpi është i kotë, çfarë duhet dhe çfarë nuk duhet të blihet në farmaci, cila furrë ka më pak radhë, te cili dyqan i fruta-perimeve ka më pak katundarë, sepse nga 60 minuta uji dhe dritat si kryefjala e kohës, të lënë shumë pak kohë për të përzgjedhur itinerarin me dedikim!
Deri sa ditët po kalonin dhe Edi Rama po ekzaltohej nga vuajtjet e atyre shqiptarëve që u bie letra me vrimë për tu zvarritur për 60 minuta, shqiptarët, ata që lanë Enver Hoxhën për 50 vjet pa Coronën tu bëjë gjëmën, heshtin. Por kjo e acaron Again e Partisë, ai nuk është Enveri, nuk do vetëm vuajtje dhe rënkim; Ai do vuajtje dhe rënkim duke larë duart dhe me distancë sociale! Për ta bërë të flas miletin, i premton 90 minuta dhe sërish dëgjohet masa e marrë: Mirë e ka Edi Rama.
Tregu i Kombinatit kurrë nuk ishte normal, as në kohën e Salës as të Nanos. Ky shpëtimtari i kombit e njihte shumë më mirë situatën sepse i konsumoi tri mandate si i pari i Tiranës, por mrekullohej në vuajtjet e shqiptarëve plotë baltë ose pluhur me djersë të pashmangshme; Limon me duhan Taraboshi, Cigare me luleshtrydhe, këpucë vendore me domate zemër kau, mjaltë trumze me ilaç për buburrec patatesh, kaluan me vite të tëra demokracie nëpër duart e shqiptarëve në Tregun e Kombinatit, pa duart e lara dhe pa distancë sociale. Jo pse është normale, jo pse lejohet, por të tillë e donte shqiptarin virusi nga Sena e pistë!
Pamjet nga ky treg, kanë tjetër diçiturë në Kullën e Surrelit! Zgjohet Edi Rama, thërret ushtrinë, çon portën dezinfektuese dhe vendos, Yllin e Davidit të verdhë! Jo, jo, shumë është! Pikën e verdhë, se shqiptarët e duan kur u thotë Edi Rama, Pikë!
Dhe, mrekullohet, kur shqiptarët ndalojnë në Pikën e verdhë të sunduesit, kapin domaten, nuk zgjaten dot deri te kastraveci, kapin me hile 2-3 copë, kungulleshat i kanë pranë, por ç’i duhen kur hudhrat i kanë larg “Pikës së Davidit”!
A thua i konsideron shqiptarët Edi Rama si çifutë?! Kurrë, as atëherë! Babai i mizorisë ka lexuar dhe e dinë se ata ishin kreativ jo vetëm të shënjuar me Yllin e Davidit të verdhë por edhe para ekzekutimit. Ata nuk e ulnin kokën, nuk i miratonin mizoritë në emër të racës së pastër ose larg qoftë për të thënë: Mirë e ka Hitleri!
E Edi Rama i merr shqiptarët që u doli letra me vrimë, i fut në portën e fatit për ti dezinfektuar, i vendos në Pikën e verdhë dhe i përcjellë të dezinfektuar nga vendi ku për 30 vjet u larguan me kutërbim rakie, erë djerse të përzier me qershi, aromë selinoje që e hallakatë fërneti dhe lule dafine të trullosur nga kastraveci i serës së pistë me dhe metalurgjiku të Elbasanit, duke ju premtuar se do të jenë sërish të pistë kur ai këtë luftë ta quan të përfunduar.
Dhe, për ta përmbyllur epshin e tij mizor, u kujtua se veriun e la paksa të qetë. Çoi gjeneralin e dështuar për t’iu thënë në Shkodër se nuk bëhet fjalë vetëm për virus por Corona është dhe malok. E kush janë këta që quhen shkodranë, dhe mund të sëmuren e madje edhe të vdesin pa e pyetur Edi Ramën. T’i rrisin numrat e të infektuarve dhe të vdekurve pa i marrë leje Kryeministrit. Kanë kërkuar mjekun, e çka pastaj, mjeku në kohën e Coronës është për të shëruar ata që thotë Kryeministri dhe jo ata që prek virusi! Ndryshe, ç’kuptim kanë masat e vendosura nga Qeveria.
E meqë e vuri në fe Tregun e Kombinatit u kujtua për Zdralen e Shkodrës. Dhe shiko habinë nga Surreli, nuk paska distancë sociale në Zdrale!
Ç’është e vërteta, në Shkodër Edi Rama nuk ishte tre mandate kryetar bashkie, por Treg Kombinati ose Zdrale ka në çdo qytet dhe fshat të Shqipërisë dhe nuk ka pse habitet! A janë burime infeksioni?! Patjetër që janë edhe pa Coronë madje!
Por, a e ka mirë Edi Rama?! Patjetër që nuk e ka!
Edi Rama u bë Kryeministër në vitin 2013 jo për të pritë Coronën të vij nga Kina për ti bërë shqiptarët të pastër, me distancë sociale dhe tregje me kushte higjieno-sanitare.
Pas 7 vjet qeverisje Edi Rama u thotë shqiptarëve lani duart ashtu siç u thoshte Enver Hoxhës për 50 vjet, edhe pse e din që shqiptarët nuk kanë as sapunë!
Pas 7 vjet qeverisje Edi Rama u kërkon distancë sociale kur ata as abone nuk marrin dot pa përdor grushtin dhe bërrylin ndonëse jemi në vitin 2020.
Pas 7 vjet qeverisje Edi Rama habitet me Tregun e Kombinatit dhe Zdralen, madje gjenerali i dështuar nga Munchheni e quan Kandahar, kur asnjë gozhdë nuk ka investuar jo në Zdrale por as në Shkodër. Nuk e di pse ankohet, ndërtoi Stadiumin në Shkodër për Dukën, pse nuk e çon Dukën atje por këtë analfabetin ushtarak që hoqi dorë nga spaletat.
Dhe në fund për Coronën! Edi Rama as nuk e solli e as nuk do ta largoi Coronën nga Shqipëria. Shqiptarët ashtu të palarë dhe pa distancë sociale mbijetuan në Perandorinë Osmane; Edhe komunizmi si pandemi shkatërruese mori shumë jetë njerëzish dhe denigroi qenien shqiptare, por shqiptarët mbijetuan; Erdhi pandemia rilindje, përçudnoi gjithçka në Shqipëri por shqiptarët ca nëpër Evropë, e ca nëpër Kombinat e Zdrale i mbijetuan këtij terrori komunist për të ardhur ballë për ballë me Coronën. Sot shqiptarët mund të ankohen se po kalojnë nëpër një terror të vërtetë nga Edi Rama, mund të shkojnë para pasqyrës dhe të jenë të lumtur që nuk shohin ndonjërin nga mjekët e spitalit infektiv, por për të kuptuar pse ndodhë kjo, le ti japin përgjigje vetes: Pse sundoi Enver Hoxha 45 vjet?! Pikë!
