Mirë se vjen 2024!
nga Agim Popoci
Bukë e krypë e zemër!
Përveç kësaj mikëpritje tradicionale, shqiptarët kanë shumë arsye ti gëzohen vitit 2024 dhe ti shprehin mirëseardhje!
Kryeministri Edi Rama mund të vazhdojë me marrëzirat e tij, por, nuk ka më shqiptarë mbi këtë tokë dhe jo vetëm, që do ta besoj se Presidenti i Serbisë, Aleksandar Vuçiç është properëndimorë!
Rruga e Arbërit mund të inaugurohet edhe 15 herë në vitin 2024, por, tuneli i Murrizit nuk do të hapet më, ai u hap! Dhe, viti 2024 është vit kur përfundon ndërtimi i rrugëve në Jug dhe shqiptarët në Veri mund të shpresojnë që për shkak të votave për zgjedhjet e vitit 2025, Edi Rama mund të ndërtoj edhe ca metra rrugë në Veri! Të paktën aty nga përfundon rruga që e quajti “e asgjëkundit” dhe i sjellë çdo vit mbi 3 milionë turistë, për ta vazhduar nga Miloti në Tiranë dhe bregdetin shqiptar!
SPAK dhe GJKKO në vitin 2024 mund të bëjnë edhe shumë marrëzira por nuk do të mund të japin vendime si për Ish-Kryeministrin Sali Berisha për ti ndaluar ujin, ajrin dhe tokën shqiptare; Madje ti shohë në sy edhe të bijën dhe të birin! Jo se sigurimsit Kruja nuk i shkojnë ndërmend masa të këtij lloji, por, nuk ka Ish-Kryeministër tjetër meqë është vënë në kujdesin e vëllaut të Kryeministrit të Shkodrës, Himarës dhe gjithë Shqipërisë!
Pas dështimit të aktit terrorist serb në Banjskë, në Veri të Kosovës mund të ndodhin shumë gjëra në vitin 2024, por, asgjë e rastësishme dhe asgjë me pafajësinë e Serbisë për kontrollin e armatosur të serbëve të Kosovës.
Edhe në vitin 2024 mund të dalin përgjime të tjera të zyrtarëve të Vetëvendosjes në mediat e buzhalëve e batonëve, por, autorësia tashmë është publike dhe nuk ka më hamendësime mbi përgjuesin: Beogradi!
Edi Rama dhe BE nuk mund ta ndëshkojnë Kosovën dhe Albin Kurti sepse e ndëshkuan në vitin që lëmë pas, dhe i vetmi satisfaksion që mund të shohin shqiptarët, nëse jo heqjen e këtyre masave, është vënia e masave për Beogradin!
Me fillimin e vitit shqiptarët do të shohin liderin e Republika Srpska, Milorad Dodik, duke ju kundërvënë SHBA dhe BE si garante të Marrëveshjes së Daytonit, dhe do të kuptojnë se çfarë do të thotë kur i kundërvihesh amerikanëve dhe evropianëve, dhe çfarë ishte ajo që bënte Kryeministri Albin Kurti!
Viti 2024 mund të jetë dhe viti i fundit i bashkëjetimit të shqiptarëve me turpin që mbajnë që nga dita e çlirimit me rrugën e papërfunduar Mitrovicë-Prishtinë!
Dhe, viti 2024 përfundimisht do të jetë viti i parë dhe i qartë kur shqiptarët e Luginës së Preshevës tashmë të qartësuar do ti drejtohen vetëm shtetit amë Kosovës, përderisa Kryeministri Edi Ramam këputi edhe ato pak fije shqiptare që kishin ngelur në Tiranë!
Në Maqedoninë e Veriut, përtej simbolizmit në historinë e saj do të shënohet Kryeministri i parë shqiptarë!
Përçmimi duke ju referuar procedurave kushtetuese është i pakuptimtë sepse i tillë është dhe Kryeministri Edi Rama! Sepse, po të kishte tjetër njeri Sigurimi i Shtetit, sot, Edi Rama do të ishte thjeshtë një zhgarravitës i telajove duke ngrënë fara luledielli në bregun e Senës!
Mirë se vjen viti i ri 2024!
