Misioni faktmbledhës i EPP, Berisha: Temë qendrore, zgjedhjet dhe narkoshteti!
Pas takimit me misionin faktmbledhës të Partisë Popullore Europiane, EPP, Kryetari i Partisë Demokratike, Sali Berisha, tha se tmë qendrore e takimit me përfaqësues të 28 partive simotra ishin zgjedhjet dhe narkoshteti.
“Temë qendrore për një opozitë janë zgjedhjet dhe aty u bë një ekspoze. E keni parë ju librin 1500 faqe me mijëra dokumente. U paraqitën gjerësisht.
U diskutua për narkoshtetin, për këto që po ndodhin, asgjësimin e sistemit të drejtësisë dhe të gjitha këto,” tha Sali Berisha për takimin me Misionin i cili vjen pas dy rezolutave të EPP-së për Shqipërinë, lidhur me zgjedhjet dhe situatën politike në vend, por nuk dha detaje, duke iu referuar rregullit të konfidencialitetit “Chatham House”.
Në fund, Kryetari i Partisë Demokratike tha se pret nga ky Mision rekomandime konkrete dhe mbështetje për kërkesën e opozitës për zgjedhje të lira dhe funksionim të shtetit ligjor, ndërsa akuzoi Kryeministrin Edi Rama për asgjësim të sistemit të drejtësisë dhe mbrojtje të zyrtarëve të lartë të përfshirë në afera korruptive.
Deklaratë:
Mision faktmbledhës i Partisë Popullore Europiane.
Ju e dini që janë dy rezoluta shumë të fuqishme për Shqipërinë, njëra është miratuar në Maltë në vitin 2024, tjetra është miratuar në prill të vitit 2025, për zgjedhjet në Shqipëri dhe ka qenë kërkesa jonë që të ketë një mision faktmbledhës për të parë në vend të gjitha zhvillimet.
U jemi shumë mirënjohës.
Kanë ardhur përfaqësues të 28 partive simotra në këtë mision.
Për ne është një zhvillim jashtëzakonisht i rëndësishëm.
Lidhur me bisedimet dhe të gjitha problematikat, këto takime funksionojnë mbi rregullin e konfidencialitetit, ndaj dhe unë nuk kam ndërmend të bëj publike bisedimet që u zhvilluan.
Natyrisht temë qendrore për një opozitë janë zgjedhjet dhe aty u bë një ekspoze.
E keni parë ju librin 1500 faqe me mijëra dokumente.
U paraqitën gjerësisht.
U diskutua për narkoshtetin, por këto që po ndodhin, asgjësimin e sistemit të drejtësisë dhe të gjitha këto.
Por unë nuk mund të hyj në detaje dhe nuk kam ndërmend, për arsye sepse është rregulli Chatham House që duhet të zbatohet në këto raste.
