MIT’HAT BEJ FRASHËRI varroset me nderime në atdhe

Sot rreth orës 09:00, kanë mbërritur në atdhe eshtrat e publicistit, shkrimtarit, përkthyesit, albanologut, diplomatit, kryetarit të Ballit Kombëtar, Mit’hat Bej Frashërit.

Në prani të autoriteteve, arkmorti u mbulua me flamurin kombëtar e më pas, me nderime shtetërore, u nis nga Rinasi drejt Tiranës, ku në Akademinë e Shkencave u kryen homazhet.

Mes personaliteteve që nderuan figurën e Mit’hat Frashërit dhe kthimin e tij në atdhe ishin edhe Lulzim Basha e Sali Berisha.

Ceremonia zyrtare vazhdoi tek Kodrat e Liqenit, ku Mit’hat Frashëri do të prehet pranë 3 vëllezërve Frashëri.

Për ata që rrudhin buzët përballë nderimit të Mit’hat Frashërit, kryeministri citoi një nga porositë e tij: “3 dekada më vonë vë kusht dhe këtë duhet ta dëgjojnë ata që e përbaltën e sot rrudhin buzët, vë kusht spastrimin e figurave të kompromentuara me nazifashistët nga çdo nismë politike kundër regjimit komunist të Tiranës. Ishte mishërimi i shërbëtorit të atdheut”.

Sigurisht, një figurë jo perfekte që bëri gabime, por jo krime, tha Rama. “Padyshim edhe gaboi, por nuk bëri e nuk nxiti krim. Kush e sheh si provokim ndaj historisë së shkruar nga fitimtarët, bën mirë të ulë kokën e të kujtojë sa shumë krime bënë ata që e shkruan historinë”, u shpreh Edi Rama.

Në fund, kryeministri kishte edhe një apel: “Mjaft kemi gjykuar në mungesë. Mjaft shpërdorimit të atyre që nuk janë më”.

Ceremonia u mbyll me varrimin e eshtrave në tokën shqiptare, duke plotësuar kështu edhe amanetin e tijë.

Ndryshe, për kthimin e eshtrave nga SHBA për në vendlindje të firmëtarit të pavarësisë dhe kryetarit të Kongresit të Manastirit, Këshilli i Ministrave akordoi fondin prej 3.239.400 lekë, për organizimin e procedurave të nevojshme ndërshtetërore.

Mit’hat Frashëri ndërroi jetë në vitin 1949 në New York, SHBA.