Mitrovica e Veriut nuk e pranon iniciativën për largimin e Kryetarit Atiq

Komuna e Mitrovicës së Veriut e ka hedhur poshtë kërkesën e qytetarëve për iniciativën e largimit të Kryetarit të Komunës, Erden Atiq, nëpërmjet peticionit.

Kjo kërkesë thuhet se është refuzuar pasi nuk ishte në përputhje me Udhëzimin Administrativ të Ministrisë së Pushtetit Lokal për largimin e kryetarit të Komunës nëpërmjet peticionit.

“Kjo kërkesë nuk pranohet nga Kryesia e Kuvendit Komunal të Mitrovicës Veriore, për shkak se kërkesa nuk është në përputhje me Udhëzimin Administrativ MAPL nr.02/2023 për largimin e Kryetarit të Komunës nga funksioni,” thuhet në letrën që e ka dërguar Nexhat Ugljanin, kryesues i Kuvendit Komunal të Mitrovicës së Veriut.

Ugljanin tha se kërkesa nuk është e bazuar në udhëzimin administrativ të MAPL-së, dhe për këtë e ka njoftuar edhe këshillin nismëtar të qytetarëve.

Kujtojmë se muaj më parë, Ministria Administrimit të Pushtetit Lokal ka nxjerr një udhëzim administrativ që u mundëson qytetarëve që nëpërmjet një peticioni t’i largojnë kryetarët e komunave nga detyra.