Mitrovicë, gjenden mbetje mortore në Suhodoll

Komisioni Qeveritar Për Persona të Zhdukur ka bërë të ditur se gjatë gërmimeve në Suhodoll të Mitrovicës, janë gjetur dhe zhvarrosur mbetje mortore të një viktime, që potencialisht mund të jetë në Listën e Personave të Zhdukur.

“Mbetjet mortore të zhvarrosura do të dërgohen për ekzaminimet e nevojshme mjekoligjore dhe identifikimin përmes analizës shkencore të ADN-së. Gërmimet janë realizuar në bashkëpunim me Policinë e Kosovës, dhe Institutin e Mjekësisë Ligjore,” thekson Komisioni Qeveritar për Persona të Zhdukur përmes rrjetit social Facebook duke siguruar se do të mbajë të informuar opinionin publik për rezultatet e gjetjeve ndërsa përfundoi:

“Qeveria e Republikës së Kosovës mbetet e përkushtuar për të vazhduar angazhimin dhe punën, duke i dhënë prioritet ndriçimit të fatit të të zhdukurve me dhunë gjatë luftës, për t’i dhënë fund ankthit 24 vjeçar të pritjes së familjarëve për të ditur vendndodhjen e më të dashurve të tyre.”