Mitrovicë, pllakë përkujtimore për viktimat e Natës së Tmerrit

Tek ura e re për këmbësorë në Mitrovicë u vendos pllakë përkujtimore në nderim të viktimave të Natës së Tmerrit, kur 26 vjet më parë policia serbe dhe grupi paraushtarak “Rojet e Urës” vranë 10 shqiptarë dhe plagosën 25 të tjerë.

Kryetari i Komunës Mitrovicë e Jugut, Faton Peci, tha se kjo pllakë shërben si simbol kujtese dhe nderimi për viktimat, si dhe si dëshmi e vuajtjeve dhe padrejtësive të përjetuara.

“Në kujtim të tyre të shpalosim këtë pllakë, për shkak se duhet të jetë e paharruar sakrifica dhe gjaku i derdhur i qytetarëve shqiptarë edhe pas çlirimit të Kosovës dhe prezencës së KFOR-it në Kosovë. Ata u vranë, civilë të pafajshëm, dhe fatkeqësisht edhe ato dy netë të pambrojtur, vetëm e vetëm pse ishin shqiptarë dhe ishin rikthyer në shtëpitë dhe pronat e tyre,” tha Faton Peci.

Ndryshe, në natën mes 3 dhe 4 shkurtit të viti 2000, përmes një aksioni të organizuar nga policia serbe dhe grupi paraushtarak “Rojet e Urës”, u krye spastrim etnik në veri të Mitrovicës, duke dëbuar dhunshëm mijëra shqiptarë nga shtëpitë e tyre në jug të lumit Ibër.

Në përkujtim të viktimave, me dhimbje dhe respekt, kujtohen emrat e tyre: Nezir Voca, Shqipe Voca, Niman Sejdiu, Bashkim Rrukeci, Sebiha Abrashi, Selime Berisha, Muharrem Sokoli, Nderim Ajeti, Nerimane Xhaka dhe Remzije Canhasi, nga mosha 13 deri në 65 vjeç.