Mitrovicë, shënohet Dita e Dëshmorëve

Familjarë të dëshmorëve, bashkëluftëtarë, përfaqësues të institucioneve, organizatave të dala nga lufta, si dhe shumë qytetarë, kanë bërë homazhe në varrezat e dëshmorëve, me rastin e Ditës së Dëshmorëve të Komunës së Mitrovicës,.

“Sot si gjithmonë, sa të ketë Kosovë dhe komb shqiptar, do të vijmë këtu dhe do të përulemi më 6 qershor në Ditën e Dëshmorëve të komunës tonë. Kjo është më e pakta që mund të bëjmë si institucione komunale, por edhe si institucione të Republikës së Kosovës. Gjithsesi familjarët e dëshmorëve presin me të drejtë nga komuna e Mitrovicës që të ketë më shumë drejtësi, prosperitet, për fëmijët dhe familjet e dëshmorëve, dhe ky është obligim i ynë të cilin duhet ta përmbushim, në mënyrë që amanetin dhe vizionin e dëshmorëve tonë ta çojmë deri në fund,” tha Nënkryetari i Komunës së Mitrovicës, Faruk Mujka për KosovaPress në ceremoninë ku u u vlerësua lartë kontributi i jashtëzakonshëm i 76 dëshmorëve nga komuna e Mitrovicës, të rënë në luftën e fundit për lirinë dhe pavarësinë e vendit.

Kryetari i Organizatës së Veteranëve të luftës së UÇK-së në Mitrovicë, Rafet Ibishi, ka porositur gjeneratat e reja se dëshmorët nuk duhet harruar kurrë, ngase falë gjakut të tyre sot shteti I Kosovës gëzon lirinë.

“Kemi dalë masovikisht me i nderu dëshmorët. Një nderim sado i vogël për t’ju tregu gjeneratave të reja se nuk bënë me i harru, dhe se çdo herë duhet me i kujtua, sepse falë gjakut të tyre ne sot gëzojmë lirinë”, theksoi Ibishi.

Ndryshe, për shkak të gjendjes së përgjithshme me pandeminë, këtë vit nuk janë mbajtur aktivitete tjera sikurse më parë.