MKRS: Ndërhyrjet e Komunës Prishtinë në zonat e trashëgimisë kulturore, precedent i rrezikshëm

Ndërhyrjet e Komunës së Prishtinës në zonat e mbrojtura të trashëgimisë kulturore janë të qëllimshme dhe precedent i rrezikshëm për palët tjera në Kosovë, inkurajim në paligjshmëri dhe rrezik i drejtpërdrejtë për vlerat dhe asetet e trashëgimisë kulturore si vlera të mbrojtura me Kushtetutë dhe me ligjet e vendit.

Kështu u tha nga udhëheqësi i Divizionit për Hartim dhe Harmonizim të Legjislacionit në Ministrinë e Kulturës, Bislim Bislimi në konferencën për media që mbajti lidhur me ndërhyrjet e paligjshme të Komunës së Prishtinës në zonat e mbrojtura të trashëgimisë kulturore.

Sipas MKRS-së, Komuna e Prishtinës, kohët e fundit, po e shmang ligjin dhe këtë në disa raste radhazi. Siç është theksuar nga MKRS, zhvillimi i projekteve, prokurimi i tyre dhe nisja e punëve në lidhjen e lagjes Arbëria me platonë e Pallatit të Rinisë, në sheshin “Xhorxh Bush”, projekti në rrugën “Agim Ramadani” dhe rruga “Rexhep Luci”, janë ndërhyrje pa leje të shkruar. Dihet se këto janë sipërfaqe të mbrojtura të trashëgimisë kulturore, ku institucionet janë të kontrolluara dhe mund të lejohen vetëm me leje të shkruara nga institucioni kompetent.

“MKRS disa herë, përveç shkresave nga institucionet e  Trashëgimisë Kulturore, si Qendra Rajonale për Trashëgimi Kulturore në Prishtinë, Instituti për Mbrojtjen e Monumenteve, i është drejtuar Komunës së Prishtinës me kërkesë për bashkëpunim në rastet e ndërhyrjeve nga komuna nëpër asete dhe zona mbrojtëse të trashëgimisë kulturore.

Nga ana tjetër MKRS në shkresën e datës 18 dhjetor 2024, Sekretari i Përgjithshëm të MKRS-së u është drejtuar  kryetarëve të komunave të përmbahen nga veprimet administrative që trajtojnë ndërhyrjen nëpër asete dhe zona mbrojtëse pa leje të shkruar nga institucioni kompetent i trashëgimisë kulturore”, tha Bislimi.

Kryeinspektori i Inspektoratit për Trashëgimi Kulturore, Imer Hakaj, tha se është përgjegjës për çdo tejkalim, shkelje të ligjit dhe çkado tjetër, sepse, sipas tij, inspektori del sipas autorizimeve dhe miratimeve të drejtorit.

“Kërkesa ime zyrtare për largim nga pozita e drejtorit te inspektoratit ka qenë si shkak i presionit, i tejkalimit të kompetencës  nga kryetari i komunës  ndaj inspektorit të Trashëgimisë Kulturore. Jam munduar dhe po mundohem prapë që të qëndrojë në atë pikë për shkak se me ligjin për inspektime me akte tjera, drejtori i Inspektoratit,  kryeinspektorit,  unë  jam përgjegjës për çdo tejkalim shkelje të ligjit dhe çka do tjetër sepse inspektori del sipas autorizimeve dhe miratimeve të drejtorit”, tha Hakaj.

Ai, tutje, deklaroi se nuk bartin as një mesazh politik, por vetëm mesazhin e ligjit për asetet e trashëgimisë kulturore dhe zonat e mbrojtura me ligj.