Mocioni, Kryeministri britanik synon zgjedhje më 12 dhjetor

Kryeministri britanik, Boris Johnson tha se do t’iu japë më shumë kohë deputetëve për të diskutuar rreth marrëveshjes për largimin e Britanisë nga Bashkimi Evropian, vetëm nëse ata pajtohen që më 12 dhjetor të ketë zgjedhje të përgjithshme.

Johnson për BBC tha se po pret nga Bashkimi Evropian që të sigurojë një shtyrje të datës për largim, ndonëse ai nuk dëshiron një gjë të tillë.

Kryeministri britanik u ka bërë thirrje laburistëve opozitarë që të mbështesin zgjedhjet në mocionin që do ta prezantojë në javën e ardhshme.

Ndërkohë blloku evropian pritet që nesër të bëjë publik vendimin nëse do ta shtyjë datën për finalizim të Brexitit për tre muaj apo më pak se aq, raporton RFE.

Britania e Madhe ishte planifikuar të largohej nga BE-ja më 31 tetor.

Ndryshe, në një letër dërguar liderit të laburistëve, Jeremy Corbyn, Johnson ka thënë se “preferon mundësinë” e shtyrjes më të shkurtër siç është “15 apo 30 nëntori”. Në atë rast, siç shkruan Johnson, ai do të tentojë të fitojë mbështetjen e deputetëve në parlament, duke përfshirë atë të laburistëve.

Nëse procesi i Brexitit finalizohet në janar të vitit të ardhshëm, Johnson është shprehur se do të kërkojë që deputetët të votojnë për mbajtje të zgjedhjeve në Britani më 12 dhjetor.

Nëse laburistët pajtohen, qeveria thekson se do të tentojë të paraqesë para deputetëve marrëveshjen për Brexit, para se parlamenti të shpërbëhet për fushatën parazgjedhore më 6 nëntor.

Vendimi për largim të Britanisë nga blloku evropian ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.