Modeli “Edi Rama” e mposht Edi Ramën!
nga Agim Popoci
Përçarja që arriti ti bëjë Edi Rama opozitës tani është futur në centrifugën e mediave që ka nën kontroll Kryeministri duke na servirur një realitet që u krijua, dhe në të cilin Partia Demokratike e Sali Berishës nuk e mposht dot Partinë Socialiste të Edi Ramës!
E përçarë ose jo, Partia Demokratike siç ëshë sot nuk e mposht dot Edi Ramën, por, kjo situatë nuk është e pashpresë nëse qëllimi final i politikbërjes përcaktohet, rrëzimi i Edi Ramës nga pushteti!
Ka një model për këtë ngadhnjim që politika shqiptare e shpërfill, por është modeli i vetëm që pa diskutim e flak këtë njeri që vetëm kanalet e Senës i njeh për atdhe, dhe ai është modeli “Edi Rama”!
E para dhe e domosdoshme është ajo për të cilën Edi Rama fliste në vitet 1991 si për PPSH ashtu dhe Partinë Socialiste, meqë ideja e tij e shprehur gjatë atyre ditëve “nga një komunist të varet në shtyllë” është e parealizueshme sepse ky vend nuk ka dhe aq shtylla!
“Denoncimi pa kompromis i veprimtarisë kriminale të PPSH-së deri në nxjerrjen e saj jashtë ligjit, është i vetmi shteg nga duhet të kalojë PSSH-ja për të fituar të drejtën e qytetarisë në shoqërinë e ardhshme shqiptare dhe e vetmja mundësi për opozitën që atdheun e mbetur në duart e rrugaçëve të qosheve të errëta të nomenklaturës, apo të kriminelëve ordinerë, t’ua kthejë miliona njerëzve të ndershëm, që kanë humbur besimin,” shkruante Edi Rama në “Refleksion” botuar në vitin 1992 dhe ky duhet të jetë zotimi i një Partie Demokratike që mendon të largoj këtë kastë që krijoj ky njeri dhe po shkatërron atdheun e mbetur në duart e rrugaçëve.
Aksioni në parlament i deputetëve opozitar me flakadanë është kritikuar nga partnerët ndërkombëtarë dhe ata deputetë që tërhiqen zvarrë nga Lulzim Basha dhe janë pjesë e bashkëqeverisjes me liderin socialist! Për ti kënaqur gjithë këto orekse është e lehtë fare, le ta bëjnë opozitën siç e bënte Edi Rama në parlament me megafon dhe nuk kundërshtohej nga asnjëra nga këto palë.
Kopja nuk ka pse të jetë më e mirë se origjinali dhe nuk bëhet kiameti të mësohen dhe ca vargje për ata që nuk e dinë këngën “Qingji vogël rri mendueshëm be, beee…” në mënyrë që të mos mungojë dhe hilariteti ndër komunistët shqiptarë që do të shohin se si po shkërmoqet ngadalë piramida e tyre kriminale!
Për Kodin e ri Zgjedhor është bërë shumë shkencë dhe opozita nuk ka arsye të kërkon qiqrra në hell, mjafton të kërkoj vetëm ato të drejta që opozita e drejtuar nga Edi Rama i kishte në vitin 2008, pavarësisht rekomandimeve të OSBE-ODIHR që sot flet për avancime absurde dhe heshtë kur Edi Rama e ndryshon Kodin e dakordësuar në mënyrë të njëanshme si në vitin 2021!
Dhe, vijmë te protesta! Çka është dhuna, këtë nuk e ka përcakton Edi Rama, dhe kush e bënë pis bulevardin pas protestës, këtë nuk e përcakton Erion Veliaj!
Nëse është i paqartë Edi Rama mund ta shoh Gjermaninë e këtyre ditëve meqë qeveriset nga homologia e saj e majtë dhe meqë qeverisjen gjermane Rama e ka shumë për zot, dhe i kopjon dhe ligjin për Komisionet Hetimore; Le ta sheh se kujt i morën leje fermerët gjermanë për të hedhur plehrat natyrale në qendër të qytetit dhe kush u arrestua nga policia gjermane, dhe si bllokohet jo një kryeqytet por të gjitha qytetet!
Opozita, që ende përçahet edhe rreth organizimit të protestave paqësore për shkak të standarteve që vendos Edi Rama me Lalin e tij të Erit, le ta bëjë një protestë siç e bëri zotëruesi i gjithë pushteteve të sotme në 21 Janarin e vititi 2011!
Dhe, meqë jemi në prag të përvjetorit të kësaj proteste, kur Edi Rama tundi kasetën me pamjet e të korruptuarit Ilir Meta të transmetuar në televizionin e tij të dashur, TCH, opozitës nuk i duhet asnjë lloj kasete në botë sepse ka pretencën e prokurorisë amerikane për zyrtarin e korruptuar të FBI-së, Charles McGonigal nga Kryeministri i Shqipërisë dhe Ministri i Energjetikës!
Ndonëse opozita në këtë rast ka shumë lehtësira për të akuzuar sepse ka dy palë sipas prokurorisë amerikane, Charles McGonigalin e korruptuar dhe Edi Ramën dhe Damian Gjiknurin që e kanë korruptuar, si dhe nëntokën e përfituar nga ky korrupsion që është realitet, deri sa për Liken si Rama ashtu dhe shitësi i kasetës heshtën pa treguar se kush ishte ai që i kishte dhënë 700 mijë euro që shfaqeshin në tavolinë për korrupsion, dhe i numëronte Ilir Meta, protesta nuk ka arsye të ndryshoj skenar!
Duke harruar elementet ndihmëse si Gardën që ishte dhe është komuniste, ose dhe kreun e Grupit të Zjarrit që ishte dhe është komunist, opozita duhet të përqëndrohet në elementët tjerë të protestës për ti organizuar sipas skenarit të Edi Ramës nga viti 2011!
Nëse opozita shqiptare arrinë të organizoj këtë lloj proteste “paqësore” me standartet e Edi Ramës, duke rrëzuar dhe mitin e organizatorit perfekt, përçarjen që i ka bërë ai opozitës dhe mburret në çdo dalje publike, mund t’ja fus aty ku nuk thuhet Zotni Lafshës, nëse i është zgjuar nga gjumi!
Në fund, për ta betonuar me modelin “Edi Rama”, që pushteti i ardhdhëm demokratik të jetë i qëndrueshëm, nuk duhet neglizhuar atë që po Edi Rama e thoshte në “Refleksion” botuar në vitin 1992:
“Për sa kohë PS-ja nuk ka bërë denoncimin e plotë të origjinës dhe historisë së saj, ajo s’mund ta ketë të drejtën për të qenë një parti e ligjshme!”
