Mogherini sot në Bruksel me liderët e Ballkanit Perëndimor

Shefja për Politikë të Jashtme dhe Siguri e Bashkimit Evropian, Federica Mogherini, organizon sot një takim joformal me liderët e Ballkanit Perëndimor në Bruksel.

Në këtë takim do të diskutohet për situatën në rajon, arritjet gjatë vitit 2018, si dhe planet për vitin e ardhshëm.

“Në vitin 2018 është konfirmuar perspektiva e qartë evropiane, e bazuar në meritat dhe rezultatet, për të gjithë partnerët në Ballkanin Perëndimor”, thuhet në njoftimin e shërbimit të jashtëm të Bashkimit Evropian, raporton KTV.

Në këtë takim do të marrë pjesë Komisioneri për Zgjerim i BE-së, Johannes Hahn, presidenti i Kosovës, Hashim Thaçi, ai i Serbisë, Aleksandar Vuçiç, kryeministri i Shqipërisë, Edi Rama, presidenti i Malit të Zi, Milo Gjukanoviç, kryeministri i Maqedonisë, Zoran Zaev dhe kryetari i Këshillit të Ministrave të Bosnje dhe Herzegovinës, Denis Zvizdiç.

Ndryshe, Komisioni Evropian, në shkurt, miratoi strategjinë për Ballkanin Perëndimor, ndërkaq në samitin me BE-në në Sofje, në muajin maj, u mblodhën gjithë përfaqësuesit e vendeve të Ballkanit Perëndimor, për herë të parë pas 15 vjetëve.