Mohimi dhe fyerjet e Manastirliut, përgjigjet PD: Ky është zjarr që të çon në burg, nesër provat!
Pas mohimit të ministres Ogerta Manastirliu se kishte rënë zjarri tek Zyra e Prokurimeve në Ministrinë e Shëndetësisë, siç kishte deklaruar Lulzim Basha, dhe se tha se tym e zjarr del nga koka e Kryetarit të PD, ka reaguar Partia Demokratike përmes Sekretarit të Përgjithshëm, Gazment Bardhi, duke paralajmëruar Manastirliun se nesër do të publikojnë provat dhe ky është zjarri që do ta çoj në burg!
“Ogerta Manastirliu gënjen paturpësisht për zjarrin e rënë në Ministrinë e Shëndetësisë. Ne kemi prova për këtë skandal dhe do t’i bëjmë publike nesër. Fakti që Ministrja gënjen për zjarrin duhet të bëhet pjesë e hetimit jo vetëm për vjedhjen, por edhe manipulimin e dokumentave përmes djegies,” tha Sekretari i Përgjithshëm i PD, Gazment Bardhi, duke i bërë të qartë:
“Ky është zjarr që të çon në burg dhe nuk e shuan dot me ujë!
Ndryshe, pas deklaratës së Kryetarit të Partisë Demokratike, Lulzim Basha se ka rënë zjarri tek zyra e Prokurimeve në Ministrinë e Shëndetësisë, ministrja Ogerta Manastirliu duke mohuar këtë fakt tha se tymi i zjarrit imagjinar del nga koka e Kryetarit të PD.
“Tymi i zjarrit imagjinar që po shihni dhe dëgjoni, del nga koka e Kryetarit të PD. Dikush duhet t’i hedhë ujë në sy që ta zgjojë nga gjumi,” tha Manastirliu duke reaguar përmes rrjetit social Twitter.
Reagimi i plotë:
Fronti i vjedhjes me tendera sekret vazhdon avazin e gënjeshtrës!
Asgjë e re nga bashkëpunëtorja e Edi Ramës në vjedhje dhe në fshehjen e vjedhjes së parave të shqiptarëve me tendera sekret në kohë pandemie. Ogerta Manastirliu gënjen paturpësisht për zjarrin e rënë në Ministrinë e Shëndetësisë.
Ne kemi prova për këtë skandal dhe do t’i bëjmë publike nesër.
Fakti që Ministrja gënjen për zjarrin duhet të bëhet pjesë e hetimit jo vetëm për vjedhjen, por edhe manipulimin e dokumentave përmes djegies.
Ajo gabon rëndë që mendon se duke i zhdukur provat do të shpëtojë nga burgu.
Ogerta Manastirliu boll nxorre tym nga koka dhe gënjeshtra nga goja. E kuptojmë që ky skandal të djeg shumë. Ky është zjarr që të çon në burg dhe nuk e shuan dot me ujë!
