Mohoi masakrën, Vuçiç: Todosijeviç u dënua sepse tha të vërtetën për Reçakun

Presidenti i Serbisë, Aleksandar Vuçiç, tha se deputeti i Listës Srpska në Kosovë, Ivan Todosijeviç, është dënuar vetëm sepse ka thënë të vërtetën për Reçakun.

Todosijeviçit, raporton RFE, dje iu konfirmua dënimi me dy vjet burgim, për shkak të mohimit të masakrës së Reçakut, në të cilën forcat serbe vranë 45 shqiptarë të Kosovës, më 1999.

Në një video të postuar në Instagram, Vuçiç tha se “është shkelur rëndë e drejta e Todosijeviqit për gjykim të drejtë”, sepse, sipas tij, bazuar në Marrëveshjen e Brukselit midis Kosovës dhe Serbisë, Todosijeviç është dashur të gjykohet nga dy gjyqtarë serbë dhe një shqiptar.

Vuçiç tha se Todosijeviçit “i është shkelur brutalisht edhe e drejta për mendim të lirë” ndërsa i bëri thirrje Bashkimit Evropian që “t’i porosisë shqiptarët në Prishtinë se ata duhet t’i përmbahen asaj që kanë nënshkruar dhe pranuar” me Marrëveshjen e Brukselit.

Ndryshe, në mars të vitit 2019, raporton RFE, Todosijeviç ka deklaruar se arsye për sulmet e NATO-s në Ish-Jugosllavi ka qenë “e ashtuquajtura katastrofë humanitare në Kosovë dhe masakra e trilluar e Reçakut”.

Gjykata e Apelit në Kosovë e konfirmoi dje aktgjykimin e Gjykatës Themelore në Prishtinë, me të cilin Todosijeviç është dënuar me dy vjet burgim, nën akuzat për nxitje të urrejtjes, përçarjes ose mosdurimit kombëtar, racor, fetar apo etnik.

Në zgjedhjet parlamentare që u mbajtën në Kosovë në muajin shkurt, Todosijeviç u zgjodh deputet i Parlamentit të Kosovës nga radhët e Listës Srpska, por pas vendimit të Gjykatës së Apelit ai e humb këtë mandat.