Mos hapja e negociatave/ Basha: Rama-Bushati duhej të jepnin dorëheqjen

Kreu i PD-së, Lulzim Basha, ka reaguar përmes një deklarate mbrëmjen e së martës në lidhje me mos hapjen e negociatave për Shqipërinë.

Basha shprehet se Franca dhe Hollanda vunë veton, kurse Gjermania kërkoi hapje negociatash me kushte. Në vijim kreu demokrat thekson se Edi Rama dhe Ditmir Bushati sot duhej të kishin dhënë dorëheqjen, por ato janë të pafytyrë dhe nuk njohin moral.

“BE ka vendosur për të mos hapur negociatat për shkak të korrupsionit dhe te krimit qeveritar. Franca dhe Hollanda kane vene veton, kurse Gjermania ka kerkuar hapje negociatash me kushte.

Vendimi do të rishqyrtohet pas një viti nga Këshilli Europian, i cili do të vendosë vetëm kur të verifikohet se Shqipëria i ka plotësuar kushtet, dhe vetëm pas miratimit paraprak nga ato parlamente të vendeve anëtare që duhet të shprehen.

Por edhe në këtë ditë të hidhur për shqiptarët qeveria ka pafytyrësinë të mashtrojë dhe gënjejë duke thënë se janë hapur negociatat.

Ministri i Europës duhet të kishte dhënë dorëheqjen sot bashkë me shefin e tij. Por të pafytyrët nuk njohin as moral dhe as përgjegjësi”, shprehet Basha.