Mos pi mall, lexo qarkore!
nga Agim Popoci
Sot kur organizatat ndërkombëtare sjellin shifra të frikshme për jetesën në Shqipëri, kur toka shqiptare braktiset gjithnjë e më shumë nga shqiptarët e varfër dhe të pasur, kur Agim Kajmaku u dëshmua se është kriminel por prokuroria nuk heton pa dhënë urdhër Kryeministri, kur dy emisione televizive mbyllen me urdhër të Edi Ramës, na delë në dritë një qarkore e liderit të opozitës, e cila këshillon lidershipin e saj, që të ketë kujdes dhe të refuzon zëvendësuesin e njërit prej emisioneve të mbyllura sepse na qenka mbështetës dhe propagandues i flaktë i Kryeministrit Edi Rama!
Për ata që dinë shkrim dhe lexim, nuk i duhet një qarkore me çfarëdo lloj siglimi për të kuptuar se zëvendësuesi është mbështetës dhe propagandues i Edi Ramës. I tillë ishte që nga shkronja e parë e shkruar, dhe devotshmëria erdhi në pah kur mori të drejtoi njërën ndër mediat më të rëndësishme në vend.
Në atë kohë, Edi Rama si yll komunist në ngritje që ishte, ndonëse nuk kishte nevojë për zëvendësuesin, ai e kishte në shërbim. Dhe jo vetëm kaq! Kronikat porositeshin nga partia ndërsa titujt e kronikave merreshin me sms dhe përfundonin në ekranin më të madh dhe më antidemokratik në vend; Dhe çuditërisht edhe pse nuk kishte fare qarkore për zëvendësuesin, nuk mungonte shërbimi i tij për liderin që po kapte majat e globalizmit.
Në fund, kur lideri i zëvendësuesit u bë lider global, kur këtë e pranoi edhe vëllai i tyre Aleksandar Vuçiç, ne kemi një Shqipëri ndryshe. Pa rend dhe ligj, pa Prokurorë të Përgjithshëm, Gjykatë Kushtetutese dhe Gjykatë të Lartë, pa një pëllëmbë toke që mund të jepet me koncesion, me kriminel që bëjnë ligjin në liri dhe burgje, dhe media që fajësojnë opozitën për situatën në të cilën ndodhet Shqipëria. Kur kësaj i shtojmë edhe qarkoren e dalë dhjetë ditë më parë, siç thuhet nga zyrat demokrate, por që mbinë sot në momentin më kritik për Edi Ramën, kuptohet pse shqetësimi u konvertua nga largimi i dy gazetarëve në zëvendësimin e njërit prej tyre.
A mund të jetë kaq i fuqishëm reflektimi ndaj një qarkoreje sikur ajo të jetë e vërtetë, dhe të jetë sigluar nga Kryetari i Partisë Demokratike, Lulzim Basha!
Së pari, që qarkorja të zë vend, shqiptarët, përveç kompanive më të fuqishme që i kanë dhënë reklamën, duhet ta dinë se zëvendësuesi ka një portal e që sot pak kush e njeh.
Pak minuta në këtë portal të duhen që të kuptosh se pak rëndësi ka çfarë i thotë zëvendësuesi atyre pak lexuesve që ka sepse të gjithë janë komunistë! Është PD e kuqe ose blu, e bardhë ose e zezë, pak rëndësi ka, kur e thotë një zë që nuk ka kurrfarë impakti tek e djathta ekstreme, e moderuar ose e zhgënjyer dhe ju drejtohet vetëm atyre pa nivel, siç i përkufizoi dhe profesor Paskal Milo, dele!
Sa për ata që do të japin prononcim për zëvendësuesin ose portalin e tij, kjo është një çështje që me kohë diskutohet ndër gazetarë dhe eprorët e tyre, meqë sot përmes Zyrës së shtypit caktohet personi i cili do të prononcohet. Kjo madje vlen edhe në partinë e zëvendësuesit e cila ishte partia e parë, pas ardhjes në fron të Edi Ramës, vendosi një diktat të këtij lloji.
Partia që e dërgoi me shërbim zëvendësuesin në një nga televizionet më të rëndësishme të këtij vendi, është partia që nuk kishte nevojë për qarkore por ndaloi lidershipin e saj të marrë pjesë në shumë nga emisionet televizive, dhe nuk u shqetësua njeri. Madje as zëvendësuesi me portalin e tij.
Dhe në fund, sikur një qarkore me përmbajtje të tillë do të kishte vërtetë një efekt kaq të madh ndër lexuesit e portalit të zëvendësuesit, Ish-Gjeneral Sandër Lleshaj dhe shefi i tij Edi Rama do ta zgjidhnin lehtë luftën kundër përdorimit të drogës në Shqipëri; E kurimin e vartësisë nga droga do ta kishin të lehtë edhe të gjithë ata që kanë humbur shumë beteja në përpjekje për këtë të keqe të madhe. Këshilla e vetme, meqë do të kishte efekt dhe stimulim sikur se substancat narkotike, do të ishte: Mos pi mall, lexo qarkore!
