Mosbindja civile, Berisha: Diktatura të ardhme nuk ka! Me datën 29 tetor, shqiptarët të gjithë në protestë

Duke konstatuar dështimin e plotë të drejtësisë sorosiane në Shqipëri, Kryetari i Partisë Demokratike, Sali Berisha, e nisi konferencën e sotme për media duke komentuar raportin e World Justice Project për sundimin e ligjit ndërsa i bëri thirrje Bashkimit Evropian dhe vendeve partnere të Shqipërisë, që të heqin dorë nga mbështetja ndaj kësaj drejtësie të kriminalizuar.

Për protestën e nesërme të Partisë Demokratike ku është paralajmëruar bllokimi i gjashtë segmenteve në Shqipëri duke filluar nga ora 17:00 deri në orën 20:00, Kryetari i PD ishte i qartë, se diktatura të ardhme nuk ka ndërsa ftoj shqiptarët që me datën 29 tetor, të gjithë të marrin pjesë në protestë.

“Këtë akt, këtë vendim të mosbindjes civile, PD, demokratët dhe opozitarët e ndërmarrin si mënyrën e mbështetjes, si mënyrën e fuqisë dhe mbështetjes të interesave, të dinjitetit, të lirisë të çdo qytetari shqiptar që i beson votës së lirë.

Që beson se ligji dhe Kushtetuta duhet të funksionojnë. Që beson se Shqipëria pa opozitë është një katastrofë.

Që beson se Edi Rama me organizatën e tij kriminale qeveri është vërtetuar tashmë si armiku më i egër i qenies dhe identitetit shqiptar,” tha Sali Berisha duke sjellë statistikat e fundit të Eurostatit.

“Eurostat konfirmon se nga viti 2014-2023, Shqipëria është braktisur nga 1.099.734 qytetarë. Është braktisur nga plot 38 qytetarë dhe kjo vetëm në hapësirën e Shengenit. Nëse shton ata që janë larguar në SHBA, të tjerë që kaluan La Manshin me gomone apo shkuan në Lindjen e Mesme dhe vende të tjera, të garantoj që ata që u larguan nga ky regjim janë më shumë se 40 për qind e shqiptarëve. Ndaj edhe ato tre herë kundër regjimit, i ftoj qytetarët të bashkohen në ato protestë sepse po luftojmë pikërisht për interesat më jetike të çdo qytetari shqiptar kundër një regjimi të urryer antishqiptar.”

Para se të mbyll këtë takim, lideri i opozitës shprehu mirënjohje për diasporën shqiptare në SHBA, e cila me guximin e saj i rezervoi narkodiktatorit Ediskobar pritjen që meritonte.

“Demonstrata të atilla, ta dinë shqiptarët se ju jeni gjeneratë e re, diaspora ka organizuar kundër përfaqësuesve të regjimit komunist në OKB. Kundër përfaqësuesve të Beogradit në OKB.
Në nderin e tyre më të madh, organizoi kundër Pashiqit të shqiptarëve në Tiranë, kundër një tradhtari të kombit që po zbraz Shqipërinë sa asnjë pushtues tjetër.
Kundër një kryehajduti që vetëm në udhëtimin e fundit mund të ketë shpenzuar ndoshta edhe sa janë pensionet e mijëra pensionistëve.
Vetëm një karrige thuhet se kushtonte 3 pensione e gjysëm, pa llogaritur reklamat që sipas disa burimeve kushtonin 150 dollarë për 15 sekonda dhe u mbajt aty në atë kullë 2 ose 3 ditë.
Shumat marramendëse, udhëtimet e zyrtarëve nga Tirana për të mbushur atë sallë, më e kushtueshmja,” tha Kryetari i Partisë Demokratike, Sali Berisha, duke ritheksuar se luksi i Edi Ramës në udhëtime është përçmimi dhe përbuzja më e madhe që u bën të paktën 46 përqind të shqiptarëve të kërcënuar nga varfëria ndërsa përfundoi:
“Diktatura të ardhme nuk ka. Me datën 29, shqiptarët të gjithë në protestë.”

Fjala e plotë:

Mirëdita dhe përshëndetje gazetarëve të pranishëm që ndjekin këtë konferencë dhe qytetarëve shqiptarë që na ndjekin sot në media.

Jam para jush për të theksuar se dështimi i plotë i reformës sorosiane në Shqipëri dhe drejtësisë së re konfirmohet tashmë jo vetëm nga qytetarët dhe opozita shqiptare, nga mediat më prestigjioze ndërkombëtare, por konfirmohet nga institucione think-tanker më të specializuara të fushës.

Kështu, World Justice Project, Projekti i Drejtësisë në Botë, vlerëson një seri treguesish të shtetit ligjor dhe të funksionimit të drejtësisë dhe konstaton një rënie dramatike të këtyre treguesve në vitin 2024, krahasuar me vitin 2015.

Këtu para jush do paraqes me grafiqe këtë rënie.

Kufizimi i pushtetit të qeverisë.

Shqipëria nga vendi i 52-të është ngjitur në shkallaren e tuprit në vendin e 106 për dorën e gjatë të ekzekutivit mbi pushtetet e tjera duke kaluar me disa ende Vietnamin dhe disa diktatura të tjera në botë.

Po kështu për korrupsionin, Shqipëria ngjitet nga vendi i 78 në vendin e 107. Natyrisht në një vend ku korrupsionin e udhëheq kreu i narkoshtetit, nuk mund të ndodhë ndryshe.

Liria e shprehjes ka një rënie dramatike, nga vendi i 65 është vidhisur në vendin e 92.

Sipas këtij raporti, e drejta e protestës dhe aktivizimit publik ka rënë nga pozicioni i 54 që kishte Shqipëria me rreth 48 vende, pra sot renditet në vendin e 102 për kufizim të të drejtës së protestave dhe lirive politike.

Ndryshim dramatik ka pësuar zbatimi i ligjit. Nga vendi i 86 që ndodhej, sot Shqipëria është në vendin e 114.

Por, porsa i përket procesit administrativ, World Justice Project gjen se administrata e narkoshtetit shqiptar është njëra prej 16 administratave më të dobëta të planetit. Shqipëria në vitin 2015 renditej në vendin e 89 dhe është ngjitur në përkeqësim në vendin e 128.

Për të drejtat civile, dhe këtu duhet të ndalem pak, Shqipëria edhe këtu ka një përkeqësim dramatik prej 44 vendesh. Mbante një pozicion në vendin e 55, kurse tani renditet në vendin e 101.

Por dramatike dhe dëshmi flagrante e dështimit të reformës së drejtësisë dhe drejtësisë së re janë treguesit që vijojnë.

Për shembull, mosndërhyrja e qeverisë në vendimet civile, Shqipëria para reformës së drejtësisë ishte në vendin e 65. Pas reformës në drejtësi dhe shndërrimit të drejtësisë në një degë ekzekutivi nga reforma e Xhorxh Sorosit, Shqipëria renditet në vendin e 110. Janë një seri vendesh si Nigeria, Kenia, Tunizia, Bangladeshi, të cilat renditen gjer në 25 vende më mirë se Shqipëria, kurse Kosova fqinje renditet 44 vende më mirë se Shqipëria.

Në drejtësinë penale, Shqipëria renditej në vitin 2015, para reformës së drejtësisë, në vendin e 46. Pas shndërrimit të drejtësisë në degë ekzekutivi, Shqipëria renditet në vendin e 92. Ka humbur pra 46 vende. Ky është një tregues dramatik, kjo është ‘pavarësi’ e mercenarëve të drejtësisë Dumani-Kraja apo fytyra e vërtetë e drejtësisë me Irena Gjokat e saj.

Por jo më pak dramatike është ndërhyrja e qeverisë në drejtësinë penale. Në këtë kuadër, Shqipëria para reformës renditej në vendn e 62, kurse pas reformës sorosiane renditet në vendin e 106, duke pasur kështu shumë vende para, Vietnami, Banladeshin, Tunizinë, Kenian, Nigerinë, etj. Kurse Kosova renditet në këtë kontekst në vendin e 46.

Pra, këto tregues dëshmojnë se drejtësia e re është një drejtësi e munguar për qytetarët shqiptarë.

Është një degë ekzekutivi për narkoshtetin shqiptar.

Ndaj PD i bën thirrje Parlamentit Europian, Komisionit Europian, vendeve partnere të heqin dorë nga çdo mbështetje e kësaj drejtësie të kriminalizuar, të kontrolluar në çdo qelizë të saj nga kreu i narkoshtetit Edi Rama dhe regjimi i tij.

Të angazhojnë Komisionin e Venecias për një rishqyrtim tërësor të këtij sistemi, në mënyrë që shqiptarëve t’u rikthehet e drejta themelore e një procesi ligjor të drejtë dhe drejtësia të nxirret nga kthetrat e politikës dhe të shndërrohet në një sistem të varur nga ligji.