Mosbindja Civile sot hap siparin me Marshimin drejt Tiranës në orën 18:00

Mosbindja Civile sot hap siparin me Protestën Kombëtare e cila fillon në orën 18:00 me Marshimin drejt Tiranës.

Ndryshe nga format klasike të protestës, opozita shqiptare sot ka parashikuar fillimin e mosbindjes civile me një protestë para Kryeministrisë pa fjalime, dhe vazhdimin e saj me marshimin drejt pikave kyçe të kryeqytetit të cilat janë paarshikuar të bllokohen.

Lideri i opozitës Sali Berisha duke siguruar se çdo demokrat e opozitar është i betuar dhe i gatshëm për çdo sakrificë për dinjitetin e tyre dhe të shqiptarëve, sqaroi dhe synimin e Mosbindjes Civile që fillon me marshimin e sotëm:

“Është radha e fitores sonë. Ndaj dhe ju ftoj nga të katër anët e vendit, të bashkohemi në Tiranë në marshimin tonë për qeveri teknike, zgjedhje të lira, një Shqipëri pa burgje dhe persekutime politike.”

Ndërkohë Policia e Shtetit bënë të ditur se rreth 1500 efektivë policie do të jenë të angazhuar në terren për protestën e thirrur nga opozita pasditen e së hënës. Mësohet se krahas strukturave të rendit në Policinë e Tiranës, në gatishmëri do të jenë FNSH, RENEA dhe Garda e Republikës. 

Në orën 18:00, deri në përfundim të tubimit, thekson Policia e Shtetit, do të ketë bllokim të lëvizjes së automjeteve në bulevardin “Dëshmorët e Kombit” nga kryqëzimi i Ministrisë së Brendshme deri te sheshi “Nënë Tereza” dhe në rrugët: “Ukraina e Lirë”, “Papa Gjon Pali II” dhe “Ismail Qemali”.

Meqë opozita ka paralajmëruar se protesta do të shtrihet në të gjitha rrugët e Tiranës, policia bëri me dije se në varësi të zhvillimit të tubimit, mund të ketë kufizime të qarkullimit të automjeteve dhe në këto akse rrugore:

Kafe “Europa” – Segmenti “Ushtari i panjohur” deri te 9-katëshet;

Shkolla “1 Maji” – kryqëzimi i urës së ATSH-së deri te rruga e Elbasanit;

Kryqëzimi i Liceut Artistik deri te Fakulteti i Gjuhëve të Huaja;

Sheshi “Skenderbej”, bashkia Tiranë dhe Pallati i Kulturës;

Kryqëzimi te Librit Universitar;

Kryqëzimi i 21-Dhjetorit deri te shkolla “Sabaudin Gabrani”;

Kryqëzimet në zonën ish-Bllokut, rruga “Ibrahim Rugova” dhe rruga “Ismail Qemali”;

Rrethrrotullimi “Zogu i Zi”;

Kryqëzimi te ish-stacioni i trenit;

Kryqëzimi i urës te Taiwani;

Kryqëzimi i rrugës së Kavajës me hyrjen e sheshit “Skënderbej”;

Kryqëzimi i urës te ish-hotel “Dajti”;

Kryqëzimi i 9-katësheve me Rrugën e Barrikadave;

Rruga “Dritan Hoxha”, përpara vendit të quajtur “Kupola”;

Kryqëzimi te Pallati me Shigjeta.