Mosshpallja e fatkeqësisë natyrore, Basha: Sot nuk është dita për të drejtuar gishtin!

Kryetari i Partisë Demokratike, Lulzim Basha, vizitoi në Thumanë kampin e improvizuar, ku do të qëndrojnë banorët e pastrehë të Thumanës.

Lulzim Basha u interesua për kushtet e të pastrehëve në kampin i cili është ngritur në fushën e futbollit të qytetit, të cilët janë edhe në gjendje të rëndë emocionale dhe psikologjike.

Duke falenderuar ekipin që kryen këtë operacion humanitar të kërkim-shpëtimit dhe gazetarët që po informojnë drejt publikun për fatkeqësinë natyrore, Basha i inkurajoi të gjithë ata që punojnë për të nxjerrë njerezit nga rrënojat.

“Kemi shpresë që një djalë 25 vjecar të dalë gjallë. Dua të falenderoj edhe mediat për mbulimin që keni bërë, të gjithë si një familje e madhe së bashku do ta kapërcejmë, lutjet e mia janë për ata që janë nën rrënoja,” tha Kryetari i PD.

I pyetur për shpalljen e gjendjes së jashtëzakonshme Lulzim Basha tha se i ka bërë thirrje dy herë qeverisë, por tani nuk është momenti për të drejtuar gishtin.

“Dy herë i kam bërë thirrje qeverisë të shpallë gjendjen e fatkeqësisë natyrore, por sot nuk është dita për të drejtuar gishtin. Edhe njëherë dua t’i bëj thirrje çdo shqiptari të ndihmojnë sa të munden. Falenderoj të rinjtë që kanë sjellë ushqime dhe batanije për personat e prekur, si dhe Aleancën për Tetarin, që ka sjellë ndihmat nga Tirana,” tha Kryetari i Partisë Demokratike, Lulzim Basha.