Moti dhe korrupsioni, Berisha: Efekte shkatërrimtare mbi pronat e mijëra shqiptarëve

Këto mote, këto shira të mëdha, dëshmuan infrastrukturën fiktive ose inekzistente kundër përmbytjeve, tha sot Kryetari i Partisë Demokratike, Sali Berisha, duke fol për dëmet kolosale në infrastrukturë, mijëra kokë bagëti, qindra hektarë sera, infrastrukturë e vogëln e fshatrave, të rrënuara si asnjëherë më parë.

Narkoqeveria është në gjumë, tha Kryetari i Partisë Demokratike, duke dënuar me forcën më të madhe qëndrimin e papërgjegjshëm të qeverisë ndaj kësaj situate ndërsa u zotua se PD do të ndërmarr të gjitha nismat për një mbështetje urgjente, për zhdëmtim të plotë të gjithë pasojave.

“Moti dhe korrupsioni në sinergji, në bashkëveprim, kanë pasur këtë javë efekte shkatërrimtare mbi pronat e qindra dhe mijëra qytetarëve shqiptarë në të katër anët e vendit.
Dëmet janë kolosale jo vetëm në infrastrukturën, të cilat mediat i kanë paraqitur gjerësisht, por janë mijëra kokë bagëti, janë qindra hektarë sera, janë infrastrukturë e vogël e fshatrave, të rrënuara si asnjëherë në mote më parë.

Këto mote, këto shira të mëdha, dëshmuan infrastrukturën fiktive në këtë vend, ose ineksistente, kundër përmbytjeve.
Investimet janë në të katër anët e vendit në sistemin e kanalizimeve, por kanalet janë të mbyllura, janë të mbushura, dhe ato nuk ka kush t’i hapë sepse paratë për mirëmbajtjen e tyre vetëm vidhen.
U bënë virale në Shqipëri dhe në mbarë botën pamjet e rrugës së sapoinauguruar Qukës- Qafë Pllocë, pamjet e rrugës Kardhiq-Delvinë, pamjet e Rrugës së Arbrit, pamjet e rrugës Korçë-Ersekë, të gjitha të inauguruara vitin e kaluar ose gjatë këtij viti.
Pra, pas një periudhe shumë të shkurtër inaugurimi, u shembën njëra pas tjetrës.
Ndërkohë skarpatet shumë herë më problematike, më të larta se këto që u shembën, të ngritura 15 vite më parë në Rrugën e Kombit, në autostradën Levan-Tepelenë, në autostradën Tepelenë-Gjirokastër, dhe në autostrada të tjera të ndërtuara 13-15 vite më parë, skarpatat nuk kanë lëvizur, ndonëse ato rrugë janë ndërtuar me një çmim nga 6 deri në 10 herë më të lirë se sa këto që shemben.
Një vjedhje e tmerrshme, e paimagjinueshme, sepse ndonëse është shpenzuar 6-fishi, 8-fishi, 10-fishi sipas rrugës në ndërtimin e një kilometri, skarpatat janë lënë që të rrëshqasin, asnjë lloj përforcimi i këtyre skarpateve.
Skarpateve janë pjesë thelbësore, për të mos thënë se herë-herë edhe më të rëndësishme se traseja.
Unë u rikujtoj ju këtu se përforcimi i skarpateve të rrugës Tepelenë-Gjirokastër ka marrë dy vite, e cila gjeologjikisht konsiderohet pjesë më e shkrifët, më e rrëshqitshme.
Por ato nuk kanë lëvizur sepse paratë e taksapaguesve nuk janë vjedhur,” tha Sali Berisha ndërsa akuzoi Narkoqeverinë e cila është në gjumë!

Me këtë rast, Kryetari i Partisë Demokratike u zotua se PD do mbështesë çdo nismë për zhdëmtim të plotë të pasojave.

“Narkoqeveria është në gjumë. Ramaduro udhëton për hesape të veta personale.
Dënoj me forcën më të madhe qëndrimin e papërgjegjshëm të qeverisë ndaj kësaj situate.
PD dhe grupi i saj parlamentar do të ndërmarrin të gjitha nismat për një mbështetje urgjente, për zhdëmtim të plotë të gjithë pasojave të moteve, të cilat në rast se do ishte mirëmbajtur infrastruktura e kanaleve, ato nuk do ndodhnin.
Cilido që kërkon të bëjë diferencën, të kuptojë më mirë se çfarë u zhvillua, i sugjeroj të lexoj një status të profesor Artan Fugës, duke u kthyer nga Gjakova.
Profesori i nderuar, në statusin e tij, përshkruan një vend krejt tjetër, një vend në të cilin pavarësisht nga shirat, tokat nuk ishin përmbytur. Një vend në të cilin kudo dukeshin makineritë e punimit bujqësor.
Një vend në të cilin nafta ishte me një çmim krejt tjetër nga Shqipëria. Në të cilin kanalet funksiononin,” tha Kryetari i Partisë Demokratike, Sali Berisha, duke përfunduar:
“Pra Kosova një shtet me histori prej dy dekadash, kurse Shqipëria shkon në 113-vjetorin e pavarësisë së saj, e rrënuar nga narkoshteti në mënyrë katastrofale.
Të gjitha këto janë shprehje e një rrënimi.”