Moti i keq, anulohen përkohësisht lundrimet drejt Barit dhe anasjelltas

Si pasojë e motit të keq, Autoriteti Portual Durrës ka bërë të ditur se janë anuluar përkohësisht lundrimet drejt Barit dhe anasjelltas.

“Referuar parashikimeve të Kapitenerisë së Portit të Durrësit mbi situatën hidrometereologjike në Rajonin e Adriatikut, në orët në vijim pritet përkeqësim i motit: Forca e erës 20-30 m/s, dallgëzimi në det të hapur 6-8 bft, me lartësi dallge deri 1.70-3.50 m, kompanitë e lundrimeve bëjnë të ditur se për pasojë janë pezulluar lundrimet e trageteve mbrëmjen e sotme nga Porti i Durrësit drejt Portit të Barit në Itali dhe anasjelltas,” thekson Autoriteti Portual Durrës përmes një njoftimi ndërsa fton qytetarët që për çdo paqartësi të kontaktojnë agjencitë e tragteve ose të vizitojnë faqen zyrtare të këtij Autoriteti www.durresport.al.

Ndërkohë trageti i linjës Durrës-Ancona dhe anasjelltas do të vijojë lundrimin normalisht sipas parashikimit.