Moti i keq, linja Korfuz-Sarandë pezullon lundrimin

Për shkak të motit të keq që ka përfshirë vendin, anijet me pasagjerë të linjave Korfuz-Sarandë, të parashikuar për të mbërritur në Portin e Sarandës sot paradite, kanë anuluar lundrimin.

Në këtë mënyrë edhe udhëtimet e pasdites Sarandë-Korfuz janë anuluar.

Lundrimi pritet ti rikthehet normalitetit në datën 12 janar. Ndërkaq bëhet me dije se lundrimi gjithashtu është pezulluar edhe për anijet e peshkimit.

Ndryshe, dje Drejtoria e Përgjithshme Detare ka bërë të ditur se bregdeti ynë do të përfshihet nga era në drejtimin Jug-JugPerëndim në forcën 6-7bft deri 8bft 15-25m/s dhe lartësi dallge nga 1.80 deri 3.50 metra. Përmirësimi i kushteve hidrometeorologjike është mbas orës 06:00 në datën 11.01.2023

Me qëllim parandalimin e çdo situate të papritur për shkak të kushteve atmosferike, Drejtoria e Përgjithshme Detare ka kërkuar bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gadishmerisë së ekuipazhit në mjetet lundruese.