MPB e Serbisë fshinë shqiptarët nga regjistri civil

Ministria e Punëve të Brendshme e Serbisë ditëve të fundit ka fshirë qindra qytetarë shqiptarë nga regjistri civilë në Medvegjë. Me këtë veprim atyre u pamundësohet shfrytëzimi i të drejtës elementare për vendbanim dhe pjesëmarrje në zgjedhje.

“Gjendja është jashtëzakonisht e keqe, kemi problem me shlyerjen e shqiptarëve nga listat e votuesve. Kemi marrë hapa për ndalimin por Beogradi dhe serbët në Medvegjë nuk duan të kuptojnë që Medvegja ka shqiptarë dhe do të jenë gjithmonë me shqiptarë,” tha këshilltari në KK Medvegjë, Florim Sahiti, duke denoncuar këtë fenomen që sa shkon dhe bëhet më shqetësues.

Ndaj kësaj dukurie ka reaguar edhe Kryetari i Këshillit Nacional Shqiptar, KKNSH, Ragmi Mustafa

“Kemi kundërshtuar këtë proces diskriminues, anti-ligjor që po bëhet ndaj shqiptarëve të Medvegjës. Në këtë kuadër pavarësisht të gjithave që janë duke u përballur shqiptarët e Medvegjës, ne do duhej të mbledhim forcat dhe të kërojmë të drejtat tona,” tha Mustafa.