MPB e Serbisë: Ministri Daçiç mori një zarf me tre plumba brenda

Ministria e Brendshme e Serbisë njoftoi se dje në godinën e Qeverisë u gjet një zarf i adresuar Zv/Kryeministrit dhe Ministrit të Brendshëm, Ivica Daçiç, i cili përmbante tre plumba.

Dërgesa e dyshimtë u zbulua dje gjatë një kontrolli sigurie me skanër kur klasifikohej posta.

Hetimi përcaktoi se zarfi me mesazh të qartë mafioz, ishte dorëzuar dy ditë më parë në degën e Postës së Serbisë në qytetin e lindjes së ish-shefit të tij dhe kriminelit të luftës, Slobodan Milosheviç, Pozharevc.

U gjet personi që ia dërgoi zarfin Daçiçit
Policia identifikoi dhe gjeti personin që dorëzoi paketën, dhe hetimi për të gjitha rrethanat e ngjarjes është duke vazhduar.

Ministria e Punëve Brendshme e Serbisë tha se po merr të gjitha masat dhe veprimet e përcaktuara me ligj për të mbrojtur sigurinë e qytetarëve dhe institucioneve.