MPJ e Malit Zi shpall NON GRATA Ambasadorin e Serbisë në Podgoricë

Ministria e Punëve të Jashtme e Malit të Zi e ka shpallur sot Ambasadorin e Serbisë në Podgoricë, Vlladimir Bozhoviç, person non grata dhe i ka kërkuar që të largohet nga territori malazez.

“Pas ndërhyrjeve të gjata dhe në vijimësi, në punët e  brendshme të Malit të Zi, sjelljeve dhe deklaratave që nuk kanë të bëjnë me standardet e zakonshme dhe të pranueshme të detyrës së diplomatit, pas disa vërejtjeve me gojë dhe me shkrim për sjellje të papranueshme, dje Ambasadori Bozhoviç Kuvendin ilegal dhe jo legjitim të Podgoricës së vitit 1918 e quajti “çlirim” dhe “vullnet i lirë” i popullit malazez, me çfarë edhe një herë, në mënyrë direkte, ka përçmuar shtetin i cili i ka dhënë mikpritje diplomatike,” thekson MPJ e Malit të Zi.

Me këtë, theksohet në komunikatë, gjithashtu ka përçmuar edhe organin më të lartë ligjvënës dhe përfaqësues, Parlamentin e Malit të Zi, i cili më 29 nëntor të vitit 2018 ka miratuar Rezolutën për anulimin e vendimeve të Kuvendit të Podgoricës, i cili i ka heqë sovranitetin e Malit të Zi dhe territorin e saj i ka bashkuar Mbretërisë së Serbisë duke e rrëzuar nga froni Krajl Nikolla Petroviç Njegoshin.

“Ministria e Punëve të Jashtme e Malit të Zi për këtë vendim e ka informuar Ministrinë e Punëve të Jashtme të Serbisë, e nota do ti dërgohet edhe Ambasadorit Bozhoviç” thuhet në komunikatë.