Muriqan, fluks i madh automjetesh, temperatura mbi 40°C

Një fluks i madh mjetesh ka shkaktuar trafik të rënduar në pikën kufitare të Muriqanit, ku pritjet kanë zgjatur me orë të tëra.

Udhëtarë që hyjnë në Shqipëri, thonë se për një distancë prej vetëm një kilometri u janë dashur mbi dy orë pritje në radhë. Shumica prej tyre vijnë nga Italia, dhe pas një udhëtimi prej 15 orësh, bashkë me fëmijë në kushte shumë të vështira në kufi, thonë se presin në temperatura ekstreme që shkojnë deri në 40°C.

Qytetarët kërkojnë menaxhim më të mirë të kontrollit kufitar dhe krijimin e kushteve minimale për fëmijët dhe të moshuarit gjatë pritjes.

Burime nga policia bëjnë me dije se pala malazeze nuk ka aplikuar lëvizjen e përshpejtuar, pasi mbrëmë në Budva ka ndodhur një ngjarje kriminale dhe po kontrollojnë me imtësi çdo person të moshës nga 18 deri 35 vjeç.

Autoritetet kufitare ende nuk kanë dhënë një sqarim zyrtar mbi situatën e krijuar në pikën kufitare të Muriqan.