Mustafa: Kryeministri është pjesë e planeve për ndarjen e veriut

Kryetari i Lidhjes Demokratike të Kosovës, Isa Mustafa, kritikoi udhëheqësit e institucioneve të Kosovës për papërgjegjësi ndaj situatës në veri.

Përmes rrejtit social Facebook, Mustafa thekson se sjellja dhe veprimet e Qeverisë dhe Kuvendit po bëhen pjesë e projektit të ndarjes së veriut të Kosovës, raporton RFE.

Sipas tij, presidenti i Kosovës, Hashim Thaçi, nuk është i vetëm në idenë e tij për, ndryshimin e kufirit, apo siç e quan ai “korrigjim të kufirit”.

“Është e papranueshme që për efekte populiste e të fushatës të rrezikohet integriteti territorial dhe ushtrimi i pushtetit në terë territorin e vendit. Institucionet e tilla të papërgjegjshme duhet të japin dorëheqje dhe të shpërndahen,” thekson Mustafa.

Ja postimi i plotë:

Institucionet e vendit nuk po sillen me përgjegjësi ndaj gjendjes së krijuar në veri të vendit. Sjellja, veprimet dhe mosveprimet e Qeverisë dhe të Kuvendit, pa marrë parasysh se çfarë deklaron Kryetari i Kuvendit, Kryeministri dhe disa ministra, po bëhen pjesë e projektit të ndarjes së veriut të Kosovës. Po shihet qartë se Presidenti nuk është vetëm në idenë e tij për korrigjim të kufijve.
Është e papranueshme që për efekte populliste e të fushatës të rrezikohet integriteti territorial dhe ushtrimi i pushtetit në terë territorin e vendit. Institucionet e tilla të papërgjegjshme duhet të japin dorëheqje dhe të shpërndahen. IM