Mustafa-Kurti, takimi në Prapashticë, çfarë u diskutua

Albin Kurti dhe Isa Mustafa po e mbajnë të fshehur takimin që kanë zhvilluar mbrëmë në vilën e kreut të LDK-së në Prapashticë ndërkohë “pa gojë” ngelën edhe Zyrtarët e të dyja partive.

Zëdhënësi i LDK-së, Besian Mustafa, tha për KTV-në se nuk e di se çfarë është diskutuar në takimin e mbrëmshëm mes dy liderëve ndërkohë drejtuesit e dy partive kanë thënë se dy ditët e fundit të kësaj jave do të bëhet e pamundura për ta gjetur një marrëveshje për bashkëqeverisje, premtim që e kishin dhënë edhe përpara zgjedhjeve të 6 tetorit.

Albulena Haxhiu e Lëvizjes Vetëvendosje dhe Vjosa Osmani e LDK-së, pjesë e ekipeve që kanë zhvilluar negociatat, kanë shprehur gatishmëri edhe për lëvizje prej ofertave të fundit.

Haxhiu, të cilën mandatari për ta formuar Qeverinë, Albin Kurti, e ka propozuar për ministre të Drejtësisë, tha se Vetëvendosje është shumë e interesuar që sa më parë palët të kthehen në tavolinën e bisedimeve.