Muzeu i Masakrës së Krushës Madhe, Presidentja e Kosovës: Gardian i së vërtetës!

Presidentja Vjosa Osmani në ceremoninë përkujtimore të 25-vjetorit të masakrës së Krushës së Madhe, ka thënë se inagurimi i muzeut njësojë sikurse liria, janë rezultat i sakrificës së popullit shqiptar.

“Sot ne po inagurojmë muzeun që s’është kujtim vetëm për viktimat, por është gardian i së vërtetës për brezat që do të vijnë pas nesh. Kjo pasi është dëshmi e vendosmërisë sonë kolektive për ta mbrojtur të vërtetën e luftës sonë çlirimtare, dinjitetin e shtetin tonë. Krimet e luftës dhe gjenocidi me të cilën synohej shfarosja e popullit shqiptar të Kosovës nga regjimi i Millosheviqit, asnjëherë nuk vjetërohen, ndaj asnjëherë nuk do të ndalojmë së kërkuari që autorët të vihen para drejtësisë”, ka thënë ajo.

“Muzeu i mizorive është një testmanent i një prej kapitujve më të errët të historisë sonë nga lufta e fundit. Ky muze është në funksion të formësimit të kujtesës tonë kolektive, nderimit të viktimave e mbi të gjitha në funksion të thirrjes sonë të përbashkët për drejtësi, e cila akoma mungon”, ka deklaruar ajo.

Osmani ka thënë, se zërat e viktimave nuk do të heshten e as harrohen nëpërmjet dokumentimit me rastin e inagurimit të këtij muzeu.

“Familjet e këtyre viktimave dhe Kosova kanë nevojë për drejtësi sepse ky është parim themelor mbi të cilën duhet të funksionojë secila shoqëri, e pa të cilën paqja asnjëherë nuk është e drejtë”, ka thënë Osmani.

Hovenier: NATO reagoi për të ndaluar gjakderdhjen

Duke shprehur ngushëllimet dhe solidaritetin me familjet e viktimave, Ambasadori amerikan në Kosovë, Jeffrey Hovenier, tha se inaugurimi i Muzeut të Masakrës së Krushës së Madhe të Rahovecit, i dokumenton këtë ngjarje dhe mundëson që faktet historike të mos kontestohen.

“Ky muze do t’i ndihmojë të gjithë atyre që vijnë ta shohin atë, ta mësojnë atë që ne tanimë e dijmë, të mos lajthitet se faktet historike janë të pakontestueshme,” tha Ambasadori amerikan duke shtuar:

“NATO-ja veproi pikërisht për shkak të krimeve të tmerrshme si ky që kishte ndodhur këtu. Të njëjtën ditë, sekretarja e atëhershme e shtetit, Marilyn Albright tha: “e kemi të pamundur të negociojmë përderisa Millosheviqi shton numrin e forcave, i sulmon civilët dhe i djeg fshatrat në Kosovë.

“Aksionet e NATO-s kanë synim të shtyejnë paqen dhe sigurinë në Evropë dhe t’i jap fund mizorive dhe krizës humanitare. Si aleancë ne u bëmë bashkë për të reaguar vetëm pasi i kishim shterrur të gjitha alternativat për të ndalur gjakderdhjen,” tha Jeff Hovenier i cili në cilësinë e përfaqësuesit të presidentit amerikan në Kosovë theksoi se e kupton që familjet dhe të mbijetuarit e kësaj masakre kanë kërkuar themelimin e muzeut qe 25 vjet, teksa është shprehur krenar për kontributin amerikan në proces.

“Shtetet e Bashkuara ndihen krenare që i kemi mbështetur deri diku përpjekjet e juaja, përmes trajnimit të 30 kosovarëve për shkathtësi të intervistimit, etikë të historisë gojore dhe arkivimit si pjesë e historisë gojore të Bibliotekës Kombëtare me të mbijetuarit e masakrës së Krushës së Madhe,” tha Ambasadori amerikan në Kosovë, Jeffrey Hovenier, i cili me këtë rast në mesin e disa rrëfimeve të masakrës veçoi narrativën e ndërmarrëses Fahrije Hoti në filmin “Zgjoi” të Blerta Bashollit.

“Edhe pse u përballën me gjithë ato tragjedi të tmerrshme, gra të Krushës e tejkaluan stigmën, diskriminim, u përballën me mërzinë e tyre dhe vendosën që të krijojnë një jetesë që është e lavdërueshme për çdo individ dhe është më e madhe se individi”, ka thënë ai.

Latifaj: Muzeu i Krushës së Madhe – tregues i çmimit për liri

Ndërsa Kryetari i Komunës Rahovec, Smajl Latifaj, në ceremoninë përkujtimore të 25-vjetorit të Masakrës së Krushës së Madhe, tha se inagurimi i Muzeut që dokumenton këtë ngjarje, është tregues i çmimit të Kosovës për liri.

“Ky muze do të trokas në ndërgjegjen tonë dhe të atyre që vijnë pas nesh, duke na treguar çmimin e lartë që kemi paguar për lirinë e tokës sonë,” tha Smajl Latifi duke saktësuar se mbi 140 të vrarët e personat e zhdukur nga kjo masakër kanë pësuar vetëm për shkak të etnisë së tyre shqiptare.

“Masakra e Krushës së Madhe është një nga masakrat më masive që u bë nga paramilitarët, policia dhe ushtria e shtetit terrorist të Serbisë. Për fare pak kohë, u dogjën 850 shtëpi, u shkatërrua baza materiale e shumë fshatarëve, u asgjësuan monumentet e trashëgimisë kulturore e historike dhe u rrënua gjithçka që lidhej me trashëgiminë tonë kombëtare.”

Ndryshe, sot në 25 vjetorin e Masakrës Krushës Madhet u bë përurimi i Muzeut me mbi 200 rrëfime të masakrës së 26 Marsit 1999.