Naftëtarët vazhdojnë protestat, policia dhunën! PD: Zgjidhja e vetme, largimi Edi Ramës!

Naftëtarët e Ballshit edhe sot kanë vazhduar me protesta duke kërkuar pagat e prapambetura dhe rifillimin e punës por policia u përgjigjë me dhunë. Në situatën e krijuar ka reaguar Partia Demokratike përmes Kryetarit të PD Dega Fier, Luan Baçi, i cili dhunën policore ndaj naftëtarëve të mashtruar disa herë nga qeveria në ikje e Edi Ramës dhe deputetët e tij të Fierit e konsideron si të papranueshme ndërsa vlerëson se naftëtarët janë në të drejtën e tyre.

Fillimisht ata u grumbulluan përpara Uzinës duke kërkuar që të dinë mbi premtimet që u janë dhënë nga shteti pse nuk janë realizuar. Të irritur nga shpërfillja tentuan të futen brenda në Uzinë por policia përdori dhunë dhe gaz lotsjellës, ku si pasojë një person humbi ndjenjat.

Dhuna policore ndaj naftëtarëve të mashtruar disa herë nga qeveria në ikje e Edi Ramës dhe deputetët e tij të Fierit, për Partinë Demokratike është e papranueshme sepse naftëtarët janë në të drejtën e tyre:

“Kerkojnë shpërblimin që u takon për djersën e tyre. Naftëtarët janë të nëpërkëmbur, janë të vjedhur ndër vite nga klienetët e pushtetit dhe dhuna policore kundër hallexhinjve që nuk kanë bukë në shtëpi, është dyfish kriminale,” thekson Kryetari i Partisë Demokratike Dega Fier, Luan Baçi, duke shtuar se Rafineria e Ballshit është një nga vatrat më të mëdha të korrupsionit të kryeministrit në ikje.

“Ata nuk e zgjidhin dot hallin e naftëtarëve, sepse kanë marrë pjesën e tyre gjigande në kurriz të naftëtarëve dhe pasurisë kombëtare,” tha në reagimin e tij Luan Baçi duke ftuar naftëtarët të protestojnë para bashkisë, para prefekturës, para ministrisë së Energjitikës, para kryeministrisë, sepse është ky pushtet që e ka rrjepur vit pas viti rafinerinë ndërsa përfundoi:

“Për naftëtarët dhe çdo qytetar ndaj të cilit bëhet padrejtësi, zgjidhja është një dhe e vetme: Largimi i Edi Ramës dhe bandës së tij hajdute në pushtet.”