NASA po heton krimin e parë hapësinor, astronautja është futur…

NASA po heton krimin e parë hapësinor, raporton BBC.

Në fakt, astronautja amerikane Anne McClain thuhet se ka ndërhyrë në llogarinë bankare të ish-partneres së saj, Summer Worden. 

Worden është ankuar para institucionit përkatës ndërkohë McClain është kthyer në tokë.

Pa qëllime të këqija

Astronautja amerikane është shprehur për New York Times përmes avokatit se ka verifikuar nëse gjithçka ishte në rregull me buxhetin e shtëpisë, ose më saktë nëse ka para të nevojshme për faturat dhe kujdesin për djalin e tyre, që e kanë birësuar kur ishin bashkë. 

McClain ka pranuar se është futur në llogarinë bankare të ish-partneres por nuk kishte qëllime të këqija.

McClain dhe Worden, e cila është nëpunëse e forcave ajrore amerikane, janë celebruar në vitin 2014, e Worden në vitin 2018 ka kërkuar divorcin. 

McClain ka të kryer akademinë prestigjioze amerikane “West Point” dhe ka shërbyer si pilote në Irak. Si astronaute ka kaluar gjashtë muaj në Stacionin Hapësinor Ndërkombëtar, dhe duhej të ishte pjesë e ekipit të parë të femrave për udhëtim në hapësirë, i cili u anulua.

Ndryshe, sipas kornizës ligjore e cila është rregulluar në mes shteteve pronare të Stacionit Hapësinor Ndërkombëtar, ligji për shtetet e caktuara zbatohet për individ dhe pronë në hapësirë. Për shembull, nëse një shtetas kanadez kryen një krim në hapësirë, i nënshtrohet ligjit kanadez. Evropa në kuadër të kësaj kornize ligjore ekziston si një shtet i tërë, por secili nga shtetet mund të zbatoj ligjet e veta ndaj pajisjeve evropiane dhe personelit në hapësirë.