NATO riafirmon qëndrimin e Aleancës rreth Nenit 5

Krerët e shteteve anëtare të NATO-s, në një deklaratë formale, të lëshuar sot pas takimit,  premtuan “angazhim të palëkundur” drejt përmbushjes së objektivave për shpenzime në mbrojtje dhe kritikuan Rusinë për veprimet që, sipas tyre, kanë zvogëluar sigurinë në Evropë dhe gjetkë.

Deklarata e NATO-s riafirmoi edhe qëndrimin e aleancës rreth nenit 5 – klauzola më e rëndësishme e aleancës – që thotë se sulmi mbi një shtet anëtar konsiderohet sulm mbi të gjithë.

“Sulmi kundër një aleati do të konsiderohet sulm kundër të gjithë neve, ashtu siç qëndron edhe në nenin 5 të Traktatit të Uashingtonit. Ne do të vazhdojmë të qëndrojmë së bashku dhe të veprojmë së bashku, në bazë të solidaritetit, qëllimit të përbashkët dhe ndarjes së drejtë të barrës”, thuhet në deklaratën e NATO-s.

Në të kaluarën, presidenti i Shteteve të Bashkuara, Donald Trump, ka shprehur dyshime rreth nenit 5. Por, më vonë, ai e ka qartësuar se është “absolutisht” i përkushtuar ndaj tij.

Në një deklaratë formale, të lëshuar sot pas takimit të krerëve të shteteve anëtare, aleanca po ashtu shprehu mbështetje për Britaninë dhe konstatimet e saj se Rusia qëndron prapa helmimit me agjent nervor të një ish-spiuni rus dhe të vajzës së tij, më 4 mars, në qytetin Sallsbëri të Anglisë.