NATO: Rusia, kërcënimi më i madh për paqen dhe sigurinë!

NATO e ka shpallur Rusinë “kërcënimin më të madh dhe më direkt” ndaj paqes dhe sigurisë së vendeve anëtare, pas sulmit të paprovokuar të Moskës në Ukrainë.

Aleanca perëndimore e ka bërë këtë deklaratë, pas takimit të liderëve në Samitin që po mbahet në Madrid.

Deklarata paraqet strategjinë për t’u përballur me atë që shefi i NATO-s, Jens Stoltenberg, e ka quajtur krizën më të madhe të sigurisë prej Luftës së Dytë Botërore.

Në deklaratën e NATO-s, raporton RFE, theksohet se si sulmi rus në Ukrainë ka ndikuar në përkeqësim të sigurisë në Evropë.

Aleanca është zotuar edhe për “rritje të mbështetjes politike dhe praktike” në Ukrainë, pas pushtimit rus.

Stoltenberg ka thënë se Ukraina është duke luftuar për pavarësinë e saj, mirëpo edhe për vlerat dhe sigurinë e Perëndimit.

Zelensky paralajmëron NATO-n: Ambiciet e Moskës nuk ndalen në Ukrainë

Presidenti ukrainas, Volodymyr Zelensky u ka thënë liderëve të NATO-s, se Ukraina ka nevojë për më shumë armë të rënda dhe më shumë mbështetje financiare për t’u përballur me pushtimin rus në Ukrainë, duke paralajmëruar se ambiciet e Moskës nuk do të ndalen në këtë shtet.

“Neve na duhet të ndalim avantazhin e artilerisë ruse…neve na duhen më shumë sisteme moderne, artileri moderne”, ka thënë Zelensky, teksa i është adresuar Samitit të NATO-s.

“Kjo nuk është luftë që ka nisur nga Rusia vetëm kundër Ukrainës. Kjo është luftë për të diktuar kushtet në Evropë – për atë sesi do të duket e ardhmja në botë”, ka thënë Zelensky përmes video-lidhjes.

Ai ka bërë thirrje edhe për më shumë ndihmë financiare, duke thënë se Ukrainës i duhen 5 miliardë dollarë në muaj për mbrojtje kundër agresionit rus.

Zelensky ka bërë thirrje për më shumë sanksione ndaj Rusisë, të cilat do t’ia pamundësojnë këtij shteti sigurimin e parave për luftë.

“Rusia ende pranon miliarda dollarë çdo ditë dhe i shpenzon ato për luftë. Ne kemi deficit në vlerë të disa miliarda dollarëve, ne nuk kemi naftë dhe gaz për ta mbuluar atë”, ka thënë Zelensky.

Ftesa për Suedinë dhe Finlandën

Në deklaratën e NATO-s, liderët janë pajtuar që edhe zyrtarisht të ftojnë Finlandën dhe Suedinë për t’iu bashkuar aleancës, pas heqjes së vetos nga ana e Turqisë.

“Sot, ne kemi vendosur të ftojmë Finlandën dhe Suedinë që të bëhen vende anëtare të NATO-s dhe të nënshkruajnë protokollet për anëtarësim”, është thënë në dokument.

Lufta e Rusisë në Ukrainë ka rritur shqetësimet në Finlandë dhe Suedi, duke i nxitur që të anëtarësohen në aleancë.

Kufiri i gjatë i Finlandës dhe Rusinë, mbi 1,300 kilometra, nënkupton se kufiri Rusi-NATO do të zgjerohet në mënyrë dramatike.

Stoltenberg ka thënë se pret ratifikim të shpejtë të marrëveshjes.

Të dyja shtetet kanë aplikuar për anëtarësim në aleancë në mesin e muajit maj.

Pas ftesës, duhet të ketë ratifikim të procesit në të 30-të parlamentet.

“Kjo zakonisht merr kohë, por unë pres që procesi të ecë shpejt, sepse vendet aleate janë të gatshme të veprojnë sa më shpejt që është e mundur”, ka thënë Stoltenberg.

Turqia, raporton RFE, dje ka ra dakord që të heqë veton për anëtarësimin e të dyja këtyre shteteve në NATO, pas nënshkrimit të zotimeve nga Suedia dhe Finlanda për luftim të terrorizmit.

Përgjigjet Moska

Por deklaratave nga Samiti i NATO-s në Madrid, Moska i është përgjigjur shpejtë dhe me arrogancë, përmes Zv/Ministrit të Jashtëm të Rusisë, Sergei Ryabkov, duke e cilësuar lëvizje destabilizuese zgjerimin e Aleancës me Finalndën dhe Suedinë ndërsa theksoi se shumë shpejt do t’u përgjigjet forcave të reja amerikane në Evropë.

“Zgjerimin e Aleancës Veriatlantike e konsiderojmë si faktor destabilizues në marrëdhëniet ndërkombëtare. Nuk e rritë sigurinë e atyre që e zgjerojnë, dhe as atyre që anëtarësohen, dhe as shteteve tjera që Aleancën e konsiderojnë si kërcënim,” tha Zv/Ministri i Jashtëm i Rusisë ndërsa kishte përgjigje edhe për Presidentin Biden.

“Rusia nuk do ta lërë pa përgjigje vendimin e shpallur sot nga presidenti amerikan Joe Biden për të vendosur forca të reja në Evropë, përfshirë Italinë,” shprehet Zv/Ministri i Jashtëm i Rusisë, Sergei Ryabkov, ndërsa paralajmëroi se Moska ka kapacitetin dhe burimet e duhura për t’u përgjigjur.

“Rusia nuk është frikësuar nga kjo lëvizje. Washingtoni mund ta kishte shmangur një përshkallëzim të tillë!”