Nd/Sekretari amerikan i Shtetit viziton Ballkanin
Ndihmës Sekretari amerikan i Shtetit për Çështje Evropiane, Brendan Hanrahan, do të nisë një vizitë në Kosovë dhe dy vende tjera të Ballkanit, Serbi dhe Bosnje Hercegovinë.
“Pres me padurim përforcimin e lidhjeve në mes të Shteteve të Bashkuara dhe shteteve në rajon,” u shprehe Hanrahan përmes një postimi në rrjetin social X.
Brendan Hanrahan është takuar një ditë më parë me presidenten e Kosovës, Vjosa Osmani, në zyrën e Departamentit të Shtetit në Washington.
Përmes një postimi në Facebook, Presidentja Osmani tha se bashkë me diplomatin amerikan kanë diskutuar për thellimin e partneritetit strategjik midis Kosovës dhe Shteteve të Bashkuara.
“Kosova është e gatshme ta avancojë bashkëpunimin me SHBA-të në fusha kyç si mbrojtja, ekonomia, si dhe investimet strategjike me interes të ndërsjellë,” është shprehur Presidentja e Kosovës, Vjosa Osmani pas takimit me Ndihmës Sekretari amerikan i Shtetit në detyrë, Brendan Hanrahan, .
Për vizitën në Bosnje Hercegovinë, diplomati amerikan Hanrahan ka përmendur Daytonin, marrëveshjen që i ka dhënë fund luftës në Bosnje më 1995, dhe rëndësinë e përvjetorit, që duket se është referencë për Srebrenicën.
Më 11 korrik të vitit 1995 janë vrarë më shumë se 8.300 boshnjakë nga ushtria serbe. Masakra e Srebrenicës është cilësuar si më e rënda në Evropë prej Luftës së Dytë Botërore dhe njihet si gjenocid.
Në maj të vitit të kaluar, Kombet e Bashkuara e kanë miratuar një Rezolutë, e cila njeh 11 korrikun si Ditën Ndërkombëtare të Përkujtimit të Gjenocidit në Srebrenicë.
Deri më tani, mbi 6.650 viktima të gjenocidit janë varrosur në Qendrën Përkujtimore Potoçari. Më shumë se 1.000 persona të zhdukur janë ende në kërkim.
Gjykata të ndryshme kanë dënuar deri tash më shumë se 50 persona, me më shumë se 700 vjet burg, për gjenocid dhe krime të tjera në Srebrenicë, raporton RFE. Ish-udhëheqësi i serbëve të Bosnjes, Radovan Karaxhiç, është i dënuar me burgim të përjetshëm, ashtu si edhe ish-udhëheqësi ushtarak në Bosnje, Ratko Mladiç.
