Ndalimi i dinarit serb, Kurti: Vendimi i BQK-së i panegociueshëm!

Kryeministri i Kosovës, Albin Kurti, tha sot se vendimet e Bankës Qendrore të Kosovës, BQK, janë vendime të pavarura dhe ndalimi i dinarit serb në vendin tonë është i panegociueshëm.

“Në katër komunat në veri janë katër degë të bankave dhe janë 15 institucione financiare jobankare ku do të mund të dërgohen dërgesat e pagesat dhe ku do të mund të merren të gjitha ato në euro. Euroja është valutë që na vjen nga BE. Ne nuk jemi duke i thënë askujt merre valutën Lekë të Shqipërisë apo një valutë të re Dardan të Kosovës, por Euron.

Euro si mjeti i vetëm i pagesës edhe i shitblerjes i përcaktuar në mënyrë të qartë në Republikën e Kosovës nuk është një çështje e negociueshme,” tha Albin Kurti duke iu përgjigjigjur interesit të mediave pas homazheve tek shtatorja e Zahir Pajazitit, Edmond Hoxhës, Hakif Zejnullahut dhe Ilir Konushevcit në Podujevë..

Banka Qendrore e Kosovës, tha Kurti, është institucion i pavarur dhe rregullat të cilat ata i sjellin, rregulloret të cilat ata i miratojnë janë krejtësisht në përputhje me Kushtetutën dhe ligjin.

“Duhet të lihet e qetë Banka Qendrore e Kosovës dhe guvernatori Ahmet Ismajli që ta bëjë punën e tij, ashtu siç e ka fituar besimin në Kuvendin e Republikës së Kosovës,” tha Kryeministri Albin Kurti duke shtuar se në Kosovë e vetmja valutë e shkëmbimit dhe shitblerjes është Euro dhe Qeveria nuk është duke dashur të ndëshkoj askënd, por të sjellë ligjshmëri, kushtetutshmëri dhe rregullsi ndërsa përfundoi:

“Edhe në veriun e Kosovës, edhe gjithandej ku ka serbë në Kosovë që janë një komunitet, mua më ka Kryeministër e Ahmet Ismajlin e ka Guvernator“, tha Kurti.