Ndërhyrjet e jashtëzakonshme/ BSH miraton rregulloren për shoqërinë që do të administrojë aktivet e bankave

Këshilli Mbikëqyrës i Bankës së Shqipërisë miratoi rregulloren “Për krijimin dhe funksionimin e shoqërisë për administrimin e aktiveve”. Kjo shoqëri do të jetë pjesë eventuale e skemës së ndërhyrjes së jashtëzakonshme, si entiteti ku do të injektohen fondet publike për të marrë nën kontroll bankat në vështirësi.

Më konkretisht, shoqëria për administrimin e aktiveve do të krijohet me qëllim marrjen dhe administrimin e aktiveve, të drejtave dhe detyrimeve të bankës në ndërhyrje të jashtëzakonshme ose bankës urë, në funksion të instrumentit të ndarjes së aktiveve dhe në përputhje me strategjinë e ndërhyrjes së jashtëzakonshme.

Qëllimi final do të jetë administrimi i aktiveve, të drejtave ose detyrimeve të transferuara pranë saj, me qëllim maksimizimin e vlerës së tyre nëpërmjet shitjes. Në rastin kur e vlerëson të nevojshëm përdorimin e fondeve publike për të shpëtuar një bankë, Banka e Shqipërisë i paraqet propozimin Ministrisë së Financave, me qëllim krijimin dhe financimin e kapitalit të Shoqërisë për administrimin e aktiveve, si instrument i ndërhyrjes së jashtëzakonshme.

Vendimi formal për krijimin e shoqërisë merret nga Autoriteti i Ndërhyrjes së Jashtëzakonshme (Banka e Shqipërisë), që ka edhe kompetencën të emërojë edhe Këshillin Drejtues prej pesë personash dhe administratorin e shoqërisë. Shoqëria do të administrojë aktivet e transferuara me qëllim ruajtjen e vlerës së tyre, në përputhje me strategjinë e ndërhyrjes së jashtëzakonshme në bankë dhe ndërmerr përpjekjet më të mira për të arritur një kthim financiar për to.

Shoqëria mund të vendosë shitjen në treg të kredive ose të portofolave të kredisë, në

përputhje me çmimin më të mirë të mundshëm, titullzimin ose rifinancimin e portofolave të kredisë ose mbajtjen, rifinancimin, shitjen ose shlyerjen e titujve financiarë përkatës.

Me qëllim përmbushjen e objektivave të veprimtarisë, mund të nënkontraktohen shërbime të ofruara nga palë të treta, në lidhje me administrimin, shitjen dhe likuidimin e aktiveve të transferuara. Shoqëria duhet të hartojë dhe propozojë për miratim pranë Autoritetit të Ndërhyrjes së Jashtëzakonshme, profilin e rrezikut ndaj të cilit do të ekspozohet gjatë kryerjes së  veprimtarisë së saj. Kjo strategji duhet të përmbajë një përshkrim të rreziqeve më të rëndësishme ndaj të cilave do të ekspozohet, parimet mbi të cilat sigurohet administrimi dhe ndërmarrja e këtyre rreziqeve dhe politikat dhe procedurat e administrimit të rrezikut, si dhe parashikimet për ushtrimin e funksioneve të kontrollit të brendshëm.

Shoqëria do të raportojë çdo tre muaj pranë Autoritetit të Ndërhyrjes së Jashtëzakonshme në lidhje me aktivitetin e saj. Aktiviteti i shoqërisë do të mbyllet në momentin të gjitha aktivet, të drejtat dhe detyrimet e transferuara pranë Shoqërisë i janë shitur një pale të tretë ose janë likuiduar. /Monitor/