Ndërkombëtarëve, Presidentja e Kosovës: Vuçiç t’i jap fund ndikimit negativ ndaj serbëve në veri!
Presidentja e Kosovës, Vjosa Osmani, ka kërkuar nga komuniteti ndërkombëtar që të bëjë presion mbi Presidentin e Serbisë, Aleksandar Vuçiç, për t’i dhënë fund ndikimit negativ ndaj qytetarëve serbë në veri të Kosovës.
Tashmë është çështje ditësh, tha Osmani, kur do të përfundojë baza ligjore sa i përket afateve dhe procedurave lidhur me shpalljen e zgjedhjeve të parakohshme në katër komunat në veri.
“Pasi të përfundojë kjo i takon pastaj qytetarëve në veri nëse do ta shfrytëzojnë këtë të drejtë apo jo. Është esenciale që komuniteti ndërkombëtar të kërkoj nga Vuçiçi që të ndërpresë ndikimin negativ, frikësimin e qytetarëve dhe dhunën që përdoret nëpërmjet strukturave ilegale ndaj qytetarëve në veri dhe t’i lejojë ata të shfrytëzojnë të drejtat e tyre që garantohen edhe me kushtetutë edhe me ligj,” tha Vjosa Osmani në Dragash duke u shprehur e bindur se qytetarët serbë dëshirojnë ta shfrytëzojnë të drejtën që përmes peticionit të shpallen zgjedhjet e parakohshme.
“Këtë bindje e kam nga komunikimet që i kemi çdo ditë. Ata dëshirojnë ta shfrytëzojnë këtë të drejtë në mënyrë që të kenë zgjedhje të jashtëzakonshme dhe t’i zgjedhin kryetarët e komunave që marrin votat e qytetarëve në zgjedhje të lira e demokratike. Por deri më tash nuk shoh ndonjë vullnet nga presidenti serb që ai të ndërpresë agresionin institucional që vazhdimisht e kryen në raport me fqinjët.
Nuk shoh nga ai vullnet që të ndërpresë dhunën që përmes strukturave kriminale vazhdimisht e ushtron ndaj qytetarëve tanë në veri. Prandaj presioni duhet të jetë në Beograd, që më në fund Beogradi të fillojë të sillet në përputhje me standardet evropiane e jo si një shërbëtor besnik i Putinit dhe vetëm i Putinit.”
Lidhur me vizitën e Kryeministrit Albin Kurti në Maqedoninë e Veriut, dhe reagimin e Presidentit maqedonas Pendarovski për këtë çështje, Presidentja e Kosovës u shpreh:
“Maqedonia e Veriut është një prej fqinjëve më të çmuar të Republikës së Kosovës, ndër shtetet që e ka pranuar pavarësinë e Kosovës në momentet më kritike, një ndër shtetet më të afërta edhe fizikisht. Komunikimet mes qytetarëve tanë dhe atyre nga Maqedonia e Veriut gjithnjë kanë qenë të shkëlqyeshme dhe këto relacione janë duke u avancuar qoftë në aspektin politik edhe në atë ekonomik,” tha Presidentja e Kosov, Vjosa Osmani, duke përfunduar:
“Tani në tubime askush nga organizatorët nuk e kontrollon çdo qytetar se çfarë ka në dorë, por natyrisht se nëse institucionet e atjeshme kanë ndonjë shqetësim, e vetmja kërkesë që ne kemi si institucione të Republikës së Kosovës është që gjithçka të bëhet në përputhje me standardet më të larta ndërkombëtare të mbrojtjes së njeriut dhe mbrojtjes së komuniteteve joshumicë, duke respektuar gjithnjë rolin shtetformues të komunitetit shqiptar dhe integrimin evropian të shtetit.”
