Ndërprerja e paprecedentë e energjisë elektrike, të paktën tre të vdekur në Spanjë
Të paktën tre persona kanë vdekur në Spanjë në një incident që lidhet me ndërprerjen e paprecedentë të energjisë elektrike që paralizoi vendin të hënën, konfirmoi Garda Civile për BBC-në.
Sipas mediave spanjolle, këta janë anëtarë të një familjeje nga komuna veriperëndimore e Taboadele. Policia po heton nëse helmimi nga monoksidi i karbonit nga një gjenerator energjie me defekt luajti ndonjë rol në vdekjen e tyre, por Garda Civile nuk dh më shumë detaje.
Autoritetet po përpiqen ende të përcaktojnë se çfarë e shkaktoi ndërprerjen e energjisë elektrike që shkaktoi kaos të hënën në të gjithë Spanjën dhe Portugalinë. Sipas informacionit nga gazeta e përditshme e Madridit El País, tre të ndjerit nga Taboadela janë një çift i martuar dhe djali i tyre i rritur. Trupat e tyre u gjetën nga një kujdestar dje në mëngjes, raporton El País.
Madrid, një grua vdes në zjarr
Mediat lokale raportojnë se edhe vdekje të tjera janë nën hetim, përfshirë rastin e një gruaje në Madrid që vdiq në një zjarr që dyshohet se është shkaktuar nga një qiri i përdorur gjatë ndërprerjes së energjisë elektrike. Një grua rreth të pesëdhjetave u gjet e vdekur të hënën në mbrëmje pasi një zjarr shpërtheu në një ndërtesë në lagjen Carabanchel të qytetit.
Trembëdhjetë persona kërkuan ndihmë mjekësore për probleme që u shkaktuan nga thithja e tymit dhe pesë përfunduan në spital, tha zyra e urgjencës së qytetit.
Hetim për vdekjen e një gruaje në Valencia
Ndërkohë, në Valencia, sipas raportimeve të medias, një grua rreth të dyzetave ka vdekur, por mediat spanjolle nuk bien dakord për shkakun e vdekjes së saj. Policia lokale thotë se gruaja, e cila kishte probleme me mushkëritë, vdiq pasi ventilatori i saj ndaloi së punuari gjatë një ndërprerjeje të energjisë elektrike, sipas raportimeve të medias. Ndërsa El País raporton deklaratën nga shërbimi shëndetësor rajonal që thotë se gruaja kishte probleme të shumta shëndetësore dhe se vdiq për shkaqe natyrore.
Ndryshe, ndërprerja e energjisë elektrike shkaktoi probleme të shumëta në të gjithë Spanjën dhe Portugalinë, me Andorrën dhe pjesë të Francës që u prekën gjithashtu pjesërisht.
Në Spanjë dhe Portugali, semaforët ndaluan së punuari, sistemet e metrosë u ndalën dhe dyqanet nuk mundën të pranonin kartat e bankës , duke shkaktuar radhë të gjata në bankomatet e pakta që ende funksiononin. Në fillim, edhe rrjetet celulare u ndërprenë, kështu që për shumë njerëz ishte e vështirë të merrnin informacion.
