Ndërpritet transporti detar dhe ai ajror me Italinë, Balluku: Qytetarët që…
Ministrja e Infrastrukturës dhe Energjisë, Belinda Balluku, ka bërë me dije se sot ndërpritet transporti ajror dhe ai detar, Shqipëri- Itali dhe anasjelltas, dhe nëse Italia kërkon që të tërheqë qytetarë me nënshtetësi italiane apo nënshtetësi të tjera nga Shqipëria atëhere duhet të dërgojë avionë apo tragete bosh. Përjashtim bëjnë vetëm mallrat.
”Avioni i fundit i Al Italia është ulur sot në 10:30 me 64 pasagjerë të cilët kanë kaluar dhe janë regjistruar nga grupet e Ministrisë së Shëndetësisë në Rinas për t’u kontrolluar, dhe pas kërkimit që të vetëkarantinohen. Avioni tjetër është nisur në orën 11:30 ai i Al Italia nga Roma dhe këtu ndërpriten të gjitha fluturimet,” tha ministrja Balluku duke e pranuar dhe shqetësimin që është shfaqur nga Ambasada apo autoritetet italiane.
“Në rastet kur Italia do të tërheqë shtetasit e saj do të jetë e mundur vetëm kur Al Italia apo avionë të tjerë të aksesojnë Shqipërinë bosh, pa pasagjerë. Nuk do të lejohen më pasagjerë nga Italia për në Shqipëri. Avionët bosh mund të marrin pasagjerët. Bëjmë thirrje që kompanitë duhet të akomodojnë, si Austrian Airlines në Austri apo Air Albania në Shqipëri, akomodoni me data të tjera ata që kanë prerë bileta blera.”
Sa i përket transportit detar, Ministrja e Infrastrukturës dhe Energjisë, Belinda Balluku, sqaroi:
“Sot do të nisen tragetet e fundit Vlorë- Brindisi dhe Durrës- Bari me pasagjerët që kanë blerë bileta dhe janë për të udhëtuar sonte. Pas këtij itinerari ndërpritet çdo lundrim drejt Italisë.
Edhe në rastin e transportit detar vetëm anijet që vijnë bosh nga Italia qoftë që vijnë për pasagjerë me nënshtetësi italiane apo dhe të tjerë,” tha Belinda Balluku duke bërë të ditur se Ministria e Infrastrukturës dhe Energjisë do i ofrojë shërbimet vetëm online në këtë situatë me koronavirusin.
